Mohnyin Ginra Hepa Mare Kaw Gasat Gala Majan Laja Nga

Pajau media

June 11, 2025

KIA Masat (26) Dap Dung ginra rai nga ai Mohnyin ginra Hepa mare kaw gasat gala majan laja nga ai lam chye lu ai.

June 10 ya jahpawt daw hkying 4 jan aten daram kaw nna Hepa mare de Myen hpyen dap hte SNA pawng hpawm hpung ni htu shadut shamu shamawt wa ai majaw KIA pawng hpawm hpung ni hte ang katut gasat gala byin ai re hpe chye lu ai. Hepa mare kaw June praw 4 kaw nna Myen hpyen dap hpung ni shamu shamawt wa ai re majaw dai aten kawn gasat gala byin nga sai re.

Dai sha n-ga Masat (9) Dap Ba ginra rai nga ai Hpakant Lawng Hkang, Maw Si Za mare kaw mung June 10 ya jahpawt daw hkying 8 aten daram kaw nna hpyen n-gun kaba hte htim gasat wa ai hta Myen hpyen dap kawn 60 MM ngu maram lu ai lak nak kaba gap gasat ai lam chye lu ai.

June 10 ya shani kaw nna Hpakant Lawng Hkang Maw Si Za , Kade hte Nam Mahpyit lam dingyang Myen hpyen dap hpung ni maut manoi shamu shamawt nga ai majaw ginra masha ni hkawm sa hkawm wa grai sadi maja nna hkawm sa nga ma ai rai nna Hpakant ginra hta shana aten lamu gang hkau hta lak lai ai myi hprap zawn re ai wan ni gala taw ai lam ginra masha ni tsun ai.

Hpakant ginra hta ya aten du hkra Myen hpyen dap pawng hpawm hpung ni hpyen n-gun kaba hte shani shagu shamu shamawt nga ai sha n-ga KIA maga kawn mung hpyen shamu shamawt ai lam nga ai majaw hpyen masa grai shaja hkat nga ai re hpe mung chye lu ai.

Shiga- Htu Seng