Mohnyin Ginra Hta Jinghpaw Bu Hpun Palawng Hpun Da Ai Hkrun Lam Hkawm Masha Ni Hpe Hkap Jahkring Dingsa Ai Lam Galaw

Pajau Media Channel

24th March, 2024

Jinghpaw mung Mohnyin ginra hta Jinghpaw maka bu hpun da ai hkrun lam hkawm masha ni hpe sam hkyeng P.T.Ts hpung ni kawn hkap jahkring san jep nna Jinghpaw maka bu hpun palawng hpun da ai ngu mara tam adup gayat, dung rawt ni galaw shangun ai lam ginra masha ni tsun ai kaw na chye lu ai.

“Indaw Gyi maga kaw nna cycle hte hkawm sa wa ai re. Jinghpaw labu bu da ai. Sam Hkyeng P.T.Ts hte lam kaw hkrum katut ai shaloi cycle hkap jahkring nna nang hpa amyu rai nga san ai. Sam hkyeng re ngu tsun ai. Nang sam hkyeng re yang hpa majaw Jingpaw labu bu da ai rai ngu mara tam nna adup gayet n htawm dat ya ai” nga nna adup gayet hkrum ai ramma wa kawn tsun ai re.

N dai mabyin zawn sha Mohnyin kaw nna Myitkyina de hkrun lam hkawm ai amyu shayi langai mung Jingpaw maka bu hpun palawng hpun da ai majaw sam hkyeng hpung ni kawn dung rawt 100 lang galaw shangun ai lam matut tsun dan ai re.

“Manang ni a chyeju shakawn hpawng de shang lawm na matu sa wa ai re majaw jinghpaw wan set bu hpun da ai re. Sam hkyeng hpung ni kawn Jingpaw wan set bu hpun ai majaw nga nna dung rawt 100 lang galaw shangun ai. Latsa lang hkum tsun sum shi lang ram pyi n lu galaw ai. Manang jan mung hkrit hkrit hte galaw kau ai” nga nna ni htep ai makau grup yin ni tsun ai kaw na chye lu ai.

Mohnyin ginra hta March shata praw kaw nna sam hkyeng P.T.Ts hpung ni gaw Jinghpaw maka bu hpun ai hkrun lam hkawm masha ni hpe hkap jahkring san jep mara tam ai lam ni galaw wa ai sha n-ga tsun jahpyak ai zawn re ai, zai mazut ai lai ladat ni hte mung masha ni hpe dingsa wa ai re hpe mung chye lu ai. Ya na zawn galaw ai P.T.Ts hpyen la ni gaw tsa lu da nna nang taw ai ni re lam chye lu ai.

Ya aten sam hkyen P.T.Ts hpung ni gaw Hopin kaw nna deng (5) daram tsan ai shara hta jep joi shara jahkrat nna dung nga ai re hte Indaw Gyi ginra Nam Mun P.T.Ts jep joi shara kaw nna Mogaung ginra Kung Tan Gyi de shara htawt sit nna shara jahkrat nga ma ai hte hkawm sa hkawm wa mung masha ni kaw nna gumhpraw hta sha ai lam ni galaw nga ai re hpe mung chye lu ai.

Shiga - Kachin Pyi Tar