Mohnyin Ginra Hta Myen Hpyen Dap Hpung Ni Lak Nak Hkrup Mara Gap Shadam Ai Lam Galaw

Pajau Media Channel

12 February 2024

Myen hpyen dap hpung ni gaw gasat gala majan n nga ai Mohnyin ginra hta lak nak kaba hkrup mara gap shadam ai lam galaw ai majaw Mung masha ni grai hkrit tsang let sha nga ma ai lam ginra masha ni tsun ai.

“Shana daw hkying kru jan hta Mohnyin amyawk dap kaw nna Lak nak kaba lahkwng lang gap ai, Hkying sanit jan daram hta mung Htan Tapin Mare maga de sanat n sen matut manoi na lu ai, (30) lang daram gaw rai na re, hkying matsat jan daram hta mung kalang bai zim dat bai ngoi dat re majaw shana mung nlu yup ai” nga nna asak (45) ning re ai ginra masha tsun ai re.

Mohnyin ginra mayan nga ai Deng Shi amyawk Dap, Mohnyin dakkasu jawng makau dung ai Amyawk Dap ni re hte kam ai hku gap shadam ai majaw Mung masha ni hkrit kajawng ai, n dum shami Mung masha dum nta hkan wa hkrat na hpe mung myit tsang nga nna ginra masha ya na zawn tsun ai .

"Shana hkying sanit daram nga ai hte lam hkan masha pyi n nga sai, Ma machyi ai majaw tsi gawk woi sa na matu mung langai mung n hpaw Myo ting zim taw ai masa re, gap dat ai laknak kaba dum nta hkan wa hkrat na mung grai tsang ai, shana gat ni mung yawng pat, dut na arai ni mung naw ngam ai re wa grai hkrit ai majaw jang wa mat sai” nga nna ginra amyu shayi langai tsun ai.

Mohnyin ginra hta Myen hpyen dap kawn aten ntam lak nak kaba hkrup mara gap bun ai lam shani shagu ngu na daram byin nga ai re, n dai laman Mohnyin ginra mayan hta gasat poi byin ai lam gaw n nga ai raitim sanat kaba nsen dingyang na nga ai re majaw mung masha ni gaw aten hpring maja, hkrit tsang let sha nga ra ai re. Mohnyin ginra hta Myen hpyen dap kawn gap shadam dat ai laknak kaba a majaw yup hkring sa nga ai amyu shayi langai kaw wa hkrat nna lapai lata daw kau ra ai madang byin lai wa sai re majaw n dai ma byin zawn bai gahtap byin wa na hpe ginra masha ni grai hkrit tsang nga ma ai re hpe mung chye lu ai.

Shiga- Kachin Pyi Tar