Mohnyin Ginra Hta N Dai Laman Sanat N Sen Matut Manoi Ngoi Nga Ai Majaw Ginra Masha Ni Hkrit Tsang Nga Ai Lam

Pajau Media Channel

4th February, 2024

Mohnyin ginra hta n dai laman sam hkyeng P.T.Ts salang langai a dum nta makau kaw Feb (1) ya shani bawm kapaw manghkang byin ai hpang kaw nna Mohnyin ginra hta sanat nsen matut manoi ngoi ai lahkawng ya daram rai wa sai re lam ginra masha ni tsun ai .

“Feb (1) ya shani hkying (10) daram hta Aung Thapyae lawk hte Htan Thapin mare maga de gasat gala majan byin ai lam gaw n nga ai, sanat nsen gaw dingyang na taw ai, Feb (2) ya shana hkying (11) daram hta lak nak kaba nsen ni mung grai ngoi ai, shana marang mung hkrat taw ai majaw mu ngoi ai shadu ai, atsawm madat yu yang sanat kaba n sen re” nga nna ginra masha langai tsun ai re.

Ya na zawn gasat gala majan mung n nga ai sha sanat hkrup mara gap shangoi ai majaw mung masha ni gaw hkrit tsang nga ma ai re, sanat gap ai kapaw ai shara ni mung, Mung masha ni nga ai ginra hte grai ni gahtep ai shara ni hkan re majaw aten tup myit shim lam n lu ai nga nna ginra masha matut tsun ai. “Ngai na nta hte nau ntsan ai kaw kapaw ai re, masha hkra hkala ai lam gaw n nga ai, shani chying tung re majaw Ma ni jawng sa jawng wa galaw ai ten re majaw ginra masa gaw simsa lam n nga ai, Ma ni hpe mahtang woi la ra na zawn rai nna grai yak hkak ai”.

Bawm kapaw manghkang byin ai shara gaw (Sein Yadanar Mon ) lawk lam maw kaba mung masha hkawm sa hkawm wa law ai shara kaw re lam mung chye lu ai. Mohnyin ginra hta bawm kapaw manghkang n byin shi ai shawng daw hta gaw Myen asuya hpyen dap hte sam hkyeng P.T.Ts hpung ni hpyen n-gun lahkawn ai lam laja lana galaw nga ai re hte n dai masa hpe shazim mayu ai majaw sadi jaw ai lam mung mai byin nga ai nga nna ginra masha ni tsun maram nga ma ai re.

Shiga-Kachin Tar