Mohnyin Ginra, Na Hka Mare Uphkang Rung Bawm Kapaw Hkrum Ai Lam

Pajau Media Channel

22nd March, 2024

Jinghpaw mung Mohnyin ginra hta March (21) ya shana hkying (8:30) PM aten daram hta Na Hka mare uphkang rung bawm hte dingsa gasat hkrum ai lam ginra masha ni tsun ai kaw na chye lu ai.

“Mana marang kaba htu wa ai aten hkying matsat jan daram hta bawm nsen grai ngoi hkra na dat ai, n nan shaloi gaw mu ngoi ai shadu ai. Kade n na ai aten mare lawk rung bawm hte sa kapaw hkrum ai nga nna tsun wa ai. Masha hkra hkala ai lam n nga ai raitim wut shakum loi li hten hkrum ai lam gaw nga ai. Jahpawt wa yu yang lawk rung kaw kadai mung n nga sai” nga nna ginra masha langai tsun ai.

Mohnyin ginra lawk n kau hta gaw P.T.Ts hpung ni gaw yu maya hpun palawng hte hpyen lahkawn ai lam laja lana galaw nga ai lam mare masha langai tsun dan ai hta “Mare lawk n kau hkan P.T.Ts hpung ni hpyen lahkawn ai laja lana galaw ai. Grau nna gaw mare salang ni bungli nau n shang ai lawk ni hkan grau hpyen lahkawn ai. Dai majaw mare uphkang salang ni hpe mung shawa makawp maga hpung ni kawn sadi jaw ai mung mai byin ai nga nna tsun ma ai re”.

Mohnyin Bilu ginra hta mung ramma 2 lu hkra tam na matu myen hpyen dap matsun wa ai hta ramma marai langai gaw shi hkrai shi mying jahpan wa jaw ai lam nga ai re. Hpyen la n kam galaw yang ja gumhpraw jaw nna mai shangut ai lam shiga ni mawng nga ai raitim kade daram jaw ra ai ngu hpe tup hkrak n chye lu shi ai re.

Ya aten Myen hpyen dap gaw mungdan masha shagu hpyen magam gun ra ai ngu ai tara Upadi hpe hkrang shapraw galaw nga sai re hte nta di di laika sa ai lam Jinghpaw mung hte myen mungdan shara shagu hta lai wa sai March shata ka-ang daram kaw nna galaw hpang nga sai re hpe mung chye lu ai.

Shiga -Kachin Pyi Tar