Mohnyin Ginra Sam Hkyeng P.T.Ts Hpung Ni Kawn Shinggyim Uhpung Uhpawng Galaw Ai Masha Ni Hpe Jahkrit Shama Laika N Dau

Pajau Media Channel

6th. April.2024

Mohinyin ginra Sam Hkyeng P.T.Ts hpung ni gaw ginra kata nga Jinghpaw makam masham ningbaw ningla ni hte shinggyim nau na garaum ningtum bungli galaw ai ni hpe jahkrit shama sadi jaw n dau laika hpe April 5 ya shani n dau shapraw ai lam nga ai re hpe chye lu ai.

Ndau laika hta Jinghpaw makam masham ningbaw ningla ni, shinggyim nau na garum ningtum uhpung uhpawng ni gaw KIA,KPDF ni hte matut mahkai nna Sam hkyeng ni hpe dingbai dingna jaw na matu hkyen nga ai, galaw wa ai rai yang dai hte gindun ai yawng hpe sat kau na re lam Mohnyin ginra masha marai mali hpe mying gang jahkrit shama n dau wa ai re lam tsun wa ai re, ndai lam hte seng nna Mohnyin ginra masha tsun ai hta yam ying lawm ai ni yawng gaw mung masa hte gindun ai masha langai ma n lawm ai, tinang man ang ai hpung magam hte garum ningtum magam bungli san san galaw ai ni sha re nga nna tsun da ai re.

Sam hkyeng amyu sha langai tsun ai hta “ salang Zau mai gaw Mung masa hte achya ai lam n galaw ai, ginra gaw sharawt magam bungli hta n-gun da ding galaw ai masha langai re, shinggyim nau na garum ai magam bungli hta mung grai shakut ai re,yawng grai kam hpa ging ai masha langai re, ya pyi garum ningtum uhpung langai bai hpaw na matu hkyen nna alu mahkawng woi shakut nga ai salang langai re, ya na zawn shi ntsa n dau wa ai laika hte seng nna sam hkyeng amyu sha langai hku nna myit n pyaw ai ” nga nna tsun ai re.

 N dai masa gaw Sam hkyeng amyu sha hte jinghpaw amyu sha ni lapran mying mala hka wa hkra masing nga nga galaw ai lam langai re nga nna ginra masha langai mung tsun ai re.

 “ Mohnyin gaw moi kaw nna labau nga ai, 1976 shaning hta Sam hkyeng hte jinghpaw amyu sha shada sat nat hkat ai, dai prat hta hpyen dap asuya kaw nna nan dai hku byin hkra galaw ai re, ya mung dai ten na masa zawn sha masing nga nga galaw ai lam langai sha re ”.

Sam hkyeng hte Jinghpaw amyu sha ni lapran sai garan hkra galaw ai n dai masa gaw lai wa sai ten hta byin lai wa ai mabyin hte bung pre nga ai, lai wa sai ten hta mung ya na zawn n dau laika ni shapraw ai lam ni nga lai wa sai lam Mohnyin ginra hta mi moi prat kaw nna nga pra lai wa ai gumgai dingla ni tsun dan ai kaw na chye lu ai.

Shiga - Kachyin Pyi Tar