Mohnyin In Gyin Kung Hta Sam Hkyeng P.T.Ts Hte PDF Lapran Hpyen Masa Shaja Hkat Nga Ai Lam

Pajau Media

August 5, 2025

Jinghpaw Mung Mohnyin ginra In Gyinin kung kaw Myen Hpyen n pu na Sam Hkyeng P.T.Ts hte Hopin ginra makawp maga dap PDF ni lapran gasat gala majan laja nga ai re lam chye lu ai.

"N dai laman Sam Hkyeng P.T.Ts hpung ni mare kata Hpyen lahkawn ai, dai hpe PDF ni hkap gasat ai re" nga nna In Gyin Kung ginra masha ni tsun ai re.

Sam Hkyen P.T.Ts hte Pyu Saw Hti pawng hpawm hpung ni lai wa sai June shata kaw nna Mohnyin Hopin ginra de hpyen shamu shamawt shang wa nna Hpyen lahkawn wa ai majaw ramma law malawng hprawng koi yen nga ra ai lam chye lu ai.

Sam Hkyeng P.T.Ts hpung ni gaw Hopin Mohnyin ginra Wan Leng lam mayan hte Mohnyin Myitkyina Mawdaw lam mayan In Gyin Kung mare hta Hpyen n-gun 70 daram hte dap jung nga nna August praw kaw nna hpyen masa shaja hkat nga ai re.

Ya aten Hpakant Ginra, Manmaw Hte Mohnyin ginra ni hta gasat gala majan laja nga dingyang re hte nbungli, lak nak kaba gap bun ai majaw Mung masha si hkala law nga ai re hpe mung chye lu ai.

Shiga - Hpring