Mohnyin Kaw Madu Tam N Mu Ai Moi Mang Taw Ai Lam

Pajau Media

July 31, 2025

Jinghpaw Mung Mohnyin Muklum, Muklum Nam Pan Sun wang kata kadai gara kaw na re n chye ai, madu tam n mu ai masha moi mang langai mu hta ai lam Mettar Lay Nyin shinggyim nau na garum hpung ni tsun ai kaw na chye lu ai.

“ Moi mang hpe yu yang asak kaba nna hkam n kaja ai zawn re ai, Mung chying masat mung n lawm ai, Mohnyin kaw na mung nre, kaga ginra kaw nna du wa ai rai na masa nga ai, sumla ni sha dem da sai madu pru wa yang madun na mai ai le” nga nna shinggyim nau na garum hpung na masha ni tsun ai re.

Moi mang hpe July 29 ya shani mu ai rai nna Mohnyin tsi rung na mang tawn shara de shana daw hkying (6:00) PM aten daram hta wa sa da ai lam chye lu ai. Dai sha n-ga lai wa sai July 17 ya hta mung Mohnyin ထီးလင်းကျောင်းဇာတ်ရုံ kaw mung madu n mu ai moi mang langai hpe mu lu ai lam mung nga sai re.

Dai zawn sha Hpakant Lawng Hkang Aung Ra mare ဂန္ဓဝင် Lung Seng n hkun kaw July 30 ya shani moi mang langai waw taw ai hpe mu ai lam Lawng Hkang ginra shinggyim nau na garum hpung ni tsun ai kaw na chye lu ai.

“ Moi mang hpai na matu wa garum hpyi ai majaw seng ang ai wuhpung wuhpawng ni hpe shana nna a hkang lu ai majaw wa hpai la ai, asak si sum ai wa gaw Mogawng ginra Pin Tar mare kaw na re, nta masha ni hpe matut mahkai n lu ai majaw asak si sum ai wa hpe chye yang nta masha ni hpe shana ya marit ngu tsun mayu ai ” nga nna shinggyim nau na garum hpung ni tsun ai re.

 Moi mang hpe Lawng hkang Lup Wa, Wan nat nat re ai shara kaw tawn da nna, moi mang gaw yat taw sai re majaw seng ang ai wuhpung wuhpawng ni ahkang hte she makoi na re lam chye lu ai.

Jinghpaw Mung kata madu n mu ai moi mang ni jahkring hkring ngu na daram mu nga ai re hte Phone, Internet matut mahkai lam n lu mat ai majaw grau madu tam n mu ai moi mang ni law wa ai re lam shinggyim nau na garum hpung ni tsun ai kaw na chye lu ai.

Shiga- Kachin Pyi Tar