Mohnyin Muklum Ginra Ni Hta Lai Nna Mare Kahtawng Hkan Gasat Gala Majan Laja Nga Ai Lam

Pajau Media

August 20, 2025

N dai laman Mohnyin Muklum Ginra shara ni hta lai nna mare kahtawng shagu ngu na daram hta SNA, Myen hpyen dap pawng hpawm hpung ni hte KIA pawng hpawm hpung ni lapran gasat gala majan laja nga ai re hpe chye lu ai.

Dai ginra hta Sam Hkyeng P.T.Ts SNA dap ni n gun ja ai shara re majaw dai ginra na hkawm sa hkrun lam ni hta mung shara la nna shamu shamawt nga dingyang re.

 Lai wa sai August 18 ya hta mung Mohnyin Nam Ma muklum shang wa ai kaw masha marai 5 daram jawn lawm ai mawdaw hpung ni hpe Nam Ma ginra makawp maga dap ni hkap gasat hkrum ai hta marai 2 asak si sum nna marai 3 rim hkrum ai lam mung chye lu ai.

Myen hpyen dap mawdaw hpung ni gasat hkrum ai hpang Mohnyin ginra (409)ah myawk dap kaw nna lak nak kaba hkrup mara matut manoi gap bun ai majaw asak (60)ning re ai amyu shayi langai asak si sum ai lam nga sai lam mung chye lu ai.

N dai laman Mohnyin, Mo Gawng, Hpakant Ginra ni hta gasat gala majan laja nga ai re majaw hkrun lam Mung masha ni sha n-ga ginra masha ni gasat gala n byin ai aten raitim lak nak kaba, drone bawm sha n-ga hkam bawm ni grai sadi maja let hkawm sa ra ai lam mawdaw gau sha masha ni tsun ai kaw na chye lu ai.

Dai sha n- ga Mohnyin ginra Ma Mung Kai, Mai Nawng ginra ni hta mung ya aten du hkra gasat gala majan laja nga ai re hte SNA, Myen hpyen dap pawng hpawm hpung ni gaw nbungli bawm, drone bawm ni hte laja lana gap gasat ai majaw dai ginra hpe zep zi zing madu na matu yak taw ai masa re hpe mung chye lu ai.

Shiga - Pyilan U