Mohnyin Muklum Kaw Mu Wan Shang Ai Majaw Nta Langai Wan Hkru Mat Ai Lam

Pajau Media

16 July 2025

Mohnyin Muklum Htantabin Mare na nta langai hpe July 15 ya jahpawt hkying mali aten hkan hta mu achye hkrum nna wan shang ai majaw wan hkru mat ai hpe Htantapin mare masha langai tsun ai kawn chye lu ai.

"Mohnyin kaw wan nsa ai bat mi ram rai sai wan n-gun nlaw ai majaw aten hte aten wan jaw taw ai dai hpawt hkying 4:45 hkan wan sa na wan rawt pat ai ten hkru bat manam na rawt yu shi ai, masha nnga ai makau na nta kaw wan hkru taw re, dai nta kaw gaw nta sin ai masha nga ai rai tim zaw hkat da ai nta kaba kaw hkru taw re, wan sat mawdaw gaw jahpawt hkying 6 jan kaw she du wa nna hka masum lang ram bang nna wan jasat kau ra ai " ngu wan hkru mat ai nta htingbu ni tsun ai.

Wan hkru mat ai nta gaw Htantabin mare kaw na VIV KTV hte yep sha rai nna madu gaw nnga na gunrai ni sha bang da nna chyinghka hpe zaw hkat da ai majaw nta kata na arai ni yawng wan hkru hten mat ai lam hpe ntsa na wa bai matut tsun ai.

 Shawoi gaw Mohnyin Muklum na wan hpe Nabar wan jak rung kaw na jaw taw ai rai tim Nabar line byeng na matu yak hkak nga ai majaw ya aten hta Chihpwi wan jaw jakrung kaw na aten hte wan jaw taw nga ai gaw bat mi ram rai sai lam matut na chye lu ai.

Shiga - Kachin Pyi Tar