Mohyin Ginra Myen Hpyen Dap Hte SNA Pawng Hpawm Hpung Ni Mung Masha Ni Hpe Rim, Jep Ai Lam Laja Lana Galaw Nga

Pajau Media

April 30, 2025

Jinghpaw mung Mohnyin ginra kata ya aten Myen hpyen dap hte SNA pawng hpawm hpyen hpung ni ginra kata hpyen lahkawn ai lam, hkawm sa hkawm wa mung masha ni hpe laja lana jep joi ai lam galaw nga ai re hpe chye lu ai.

“Lam dingyang Myen hpyen la hte Sam Hkyeng P.T.Ts ni hkrai, gate hku dung ai gaw dung, lam kaw nan hkap jahkring ai ni mung nga, kachyi mi hkawm ai hte gate, lam dingyang nan re. Madung gaw phone ni jep ai, shanhte kachyi mi n tsen na zawn re ai gate de shaga la nna nan jep ai. Ngai hpe pyi rim na nga di hkying hkum mi ram san jep ai, baw kaw na lagaw du hkra nan jep ai, grai tsun na she lu lai wa ai re,” nga nna Mohnyin ginra kaw nna Myitkyina de yu wa ai hkrun lam hkawm masha tsun ai.

Hkrun lam lapran kaw nna jahkring woi la mat ai ni nga ai sha n-ga Mohnyin Na Mawn hkan mung hpyen grai lahkawn ai majaw Mung masha ni gara de n mai hkawm sa ai madang byin nga ai lam Na Mawn ginra masha tsun ai re. “Sam Hkyeng ni grai lahkawn ai, sawng dik ai gaw ma kanu ni hpe du hkra lahkawn ai. Jinghpaw ni n kau gaw hprawng ai ni gaw hprawng, hpyen nau lahkawn na dai ginra hkan na anhte Mung masha ni gaw gara pyi n mai sa,” nga nna tsun ai re.

Ya aten Myen hpyen dap gaw Jinghpaw mung shara shagu de hpyen n-gun jat htu shadut nga dingyang re hte April 23 ya shani Sanun Kung mare kaw gasat gala majan byin ai aten hprawng koi yen nga ai Na Mawn kaw nna Mung masha marai (9) hpe mung Sam Hkyeng ni rim kau ai kaw nna ya aten du hkra hpa mung shiga mung n na mat ai re hpe chye lu ai.

 April 27 ya kaw nna Mohyin, Indaw Gyi ginra de Myen hpyen dap kawn masha n gun tsa kaba htu shadut lung wa nna ya aten hpyen masa grai shaja hkat nga ai re hpe chye lu ai. Myen hpyen dap kawn hpyen n-gun nau htu wa ai majaw Mohnyin, Indaw Gyi ginra hkan na mare kahtawng n kau hpyen koi yen nga sai re hpe mung chye lu ai.

Shiga- Pyilan U