Mung Masha Ni Bai N htang Wa Nga Sai Mare Kahtawng Ni Hkan Lit Nga Ai Asuya Kawn Tsi Gawk Ni Hpaw Ya Na Hpe Mung Masha Ni Ra Sharawng Ai Lam

Pajau Media

January 8, 2026

Ya aten hpyen koi yen ai kaw nna mare buga de wa nga sai mung masha ni gaw hkam ja lam hte seng nna mare kaw asuya masing hte tsi gawn lajang shara tsi gawk ni hpaw ya na matu mung masha ni ra sharawng nga ma ai re hpe chye lu ai.

Ginra gaw sharawt gaw gap la ra ai majaw mung masha ni gaw mare buga de wa nga magang sai raitim mare kata kaw ngang kang ai tsi gawk, tsi gawn lajang shara ni n nga ai.

 Machyi makaw byin wa yang muklum kaba de sa tsi lajang la ra ai hte hkrun lam mayak law law nga ai re majaw mare kahtawng buga hkan asuya kaw nna nan masing jahkrat ai hte tsi jaw gawk ni galaw ya na matu ra sharawng nga ma ai re lam mung chye lu ai.

2024 shaning kaw nna KIA pawng hpawm hpyen hpung ni htim gasat majan hpang zing madu da lu sai ginra hkan mung masha n kau sun wang hkyen jasan let wa nga magang sai re.

Raitim dinggai dingla lu ai ni, hkam ja lam n nga ai mung masha n kau gaw mare buga de hkam ja lam hte seng nna tsi gawk ni n nga ai re majaw buga de wa na matu n gwi daw dan nna hpyen koi yen dabang hkan sha naw shanu nga ai ni mung law nga ai re hpe mung chye lu ai.

Ya aten mare buga de bai wa nga sai mare buga ni gaw Myitkyina Manmaw lam mayan na mare kahtawng ni re hte dai ginra hkan na mung machyi makaw sawng yang Myitkyina hte Laiza de gahkrang nna tsi la ra ai re hpe mung chye lu ai.

 Dai sha n-ga Manmaw Sinlum Bum ginra hta mung hpyen koi yen ai kaw nna bai wa nga sai raitim tsi gawn lajang shara n nga ai re majaw machyi makaw byin yang Mai Ja Yang, Muse , Loi Je ginra de sa ra ai hte hkrun lam tsan ai mayak ni nga ai majaw Sinlum Bum kaw tsi rung ni hpaw ya na matu ginra masha ni ra sharawng nga ma ai re lam mung chye lu ai.

ya aten hpyen yen ni bai n htang wa nga sai mare buga ni hkan hkamja lam hte seng nna Nawku Hpung hku hpaw ai Shamai Shatsai Tsi Gawk hta lai nna asuya kaw nna masat jahkrat ya ai lam n nga shi ai re hpe mung chye lu ai.

shiga- Pyilan U