Mung shawa Ni Hkawm sa Nga ai Nang Zaw Lam Hku nna LANGU mawdaw Ni n mai Lai mat ai lam

Pajau Media

July 15, 2025

Ya aten Mung masha ni madung jai lang nga ai Nang Zaw Lam gaw hkum pup htat nna Langu htaw mawdaw kaba ni n mai lai ai bat mi daram rai wa sai lam chye lu ai.

"Nang Zaw Lam gaw n dai laman lam grai yak ai, cycle lai na pyi chyip she re, lam kaw langu htaw mawdaw langai gaw galau taw, Langai Gaw galau hkyen nna n hkyeng taw, dai majaw cycle ni gaw lam makau hku garet nna hkawm taw ai masa re" nga nna lai wa lai sa masha tsun ai.

Grau nna gaw hkrun lam yak ai hta lam lapran kaw Myen hpyen dap shagyit hkan gumhpraw ladu lai hta sha ai majaw mung langu htaw mawdaw kaba ni gaw shawoi Mai Na kaw pru ai hku n re sha Nawng Hkying maga hku gayin nna hkawm ra taw ai masa re nga nna mung tsun ai.

"Lam dingyang mung P.T.Ts hte Myen Hpyen Dap shagyit hkan gumhpraw mung grai hta ai, langu htaw mawdaw langai gaw Sen Sanit lahta re da, arai htaw mawdaw ni hpe gaw Mun Manga lahta jaw ra ai, Shang Lawt Gate mung gaw nga ai tim gumhpraw n hta ai lai wa lai sa ni hpe Mung Chying jep nna shalai ai" nga nna mung matut tsun ai re.

Waimaw Wuyan lam kaba hpe Myen Hpyen Dap pat kau ai hpang Myen Hpyen Dap P.T.Ts Pawng Hpawm Hpung ni gaw Mung masha ni hte langu htaw Mawdaw ni madung lai sa nga ai Nang Zaw Lam Hku nna Mai Na de pru ai Lam ding yang shagyit dung nna gumhpraw hta sha ai re.

Mai Na hpyen yen camp shang wa ai makau hkan du hkra shagyit dung gumhpraw hta ai majaw Mung masha ni a matu shim lum lam n nga ai.

 Mai Na lam kaw shinggan bu hpun palawng hte sinat Hpye na gumhpraw hta sha ai P.T.Ts hpe n mu ai masum ya daram gaw rai wa sai. Mung masha ni gaw Mare lam maw kaw shamu shamawt nga ai hpe n ra sharawng ai lam tsun ai re hpe mung chye lu ai.

Shiga. Pyilan U