Mungchying Masat Galaw La Ai Hta Gumhpraw Grai Hta Sha Ai Lam Mohnyin Ginra Masha Ni Tsun

Pajau Media Channel

12nd March, 2024

Jinghpaw mung Mohnyin ginra masha pru shang gawn hkang rung kawn mung masha ni hpe mung chying masat galaw ya ai hta gumhpraw grai hta ai majaw mung chying masat galaw la na matu pyi grai yak hkak nga ai lam ginra masha ni tsun ai.

Mohnyin ginra hta ya aten mung chying masat galaw ai hta gumhpraw lap 60,000 kaw na lap 100,000 lapran jaw nna galaw la ra ai masa hpe ginra masha langai tsun ai.

 “Myen hpyen dap mungdan ahkaw ahkang n zing madu shi ai aten hkan gaw mung chying masat galaw yang gumhpraw n ma ra ai, Rung kaw na salang ni mung n pu kaw na chyare ni gumhpraw hta sha ai rai yang tang madun rit nga jahkring hkring tsun ai lam nga ai, n dai hpang daw de ningbaw galai ai hpang gaw ningbaw ni nan myit hkrum nna galaw sha ai masa re” nga nna amyu shayi langai tsun ai.

Htinggaw jahpan laika pa dingsa hpe n nan bai galai mayu yang gumhpraw lap 100,000 kaw nna lap 150,000 du hkra hkrat ang ai lam, n kau gaw rung du yang she gumhpraw n dang jaw nna bai nhtang wa ra ai masa ni mung byin nga ai re lam chye lu ai. “Masha pru shang rung kaw na ningbaw htawt sit wa ai n na shi ai, lahkawng ning pyi n rai shi ai wut dek nta kaba grai shachyaw la wa ai, mawdaw nga yang mung jahkring hkring galai jawn” nga nna ni nawn ai masha ni tsun ai re.

Myen mungdan kata hpyen dap kawn shagrin dat ai Upadi n nan a majaw mungdan kata na asak shi jan ning re ai ramma ni, atsam rawng ai mung masha n kau gaw maigan pru bungli galaw hkawm na matu hkyen lajang wa ai hte mung chying masat galaw ai ni galaw, galai la ra ai ni galai rai wa ai hta gumhpraw ladu lai hta sha ai, hpyi ai daram n jaw yang mung chying masat n galaw ya, aten garawt shana da ai re nga nna ginra masha ni tsun ai kaw na chye lu ai.

Shiga - Kachin Pyi tar

Photo Credit