Muse Nam Hkam Miwa Jarit Hpaw Ai Raitim Gunrai Htaw Shalai Ai Lam Masat Kau Ai Majaw Ginra Masha Ni Yak Hkak Ai Lam

Pajau Media

November 24, 2025

Sam Mung Dingdung daw Muse Nam Hkam Miwa jarit ni hpe November praw kaw nna Miwa maga kawn hpaw sai raitim Gunrai ni hpe Gunrai hpan masat nna sha shalai mai ai re hpe chye lu ai.

Ya aten Myen Mungdan kaw na pru ai Hkai Nu, Mam hte Wan N-ga zawn re ai Gunrai ni hpe sha Miwa Mungdan de shalai lu ai rai nna Miwa maga de na gaw malu masha ni hpe madung shalai ai lam chye lu ai.

 Kaga Jak rai hte seng ai gunrai ni gaw Myen Mung kaw na Miwa de n mai shalai ai nga nna Nam Hkam Ginra masha ni tsun ai.

Muse Nam Hkam Ginra masha ni gaw lai wa sai ten hkan Miwa Mung de wang lu wang lang Gunrai htaw shalai Hpaga lam hkrang ai re majaw Hpa Hka Sun, Hkainu Sun, Mam hte Wan n-ga Ju ai bungli ni hpe madung galaw sha ma ai re hpe chye lu ai.

Lai wa sai July 18 ya kaw nna Miwa jarit Gunrai htaw ginlen ai lam hpe aten n masat pat kau ai hpang Miwa Jarit Gunrai htaw shalai bungli galaw masha ni grai sum machyi mat ai re hpe chye lu ai.

Miwa jarit hpe laning mi na ai hpang November praw kaw bai hpaw ai raitim lai wa sai ten na zawn gunrai ni hpe wang lu wang lang n mai shalai mat ai majaw yak hkak ai re lam chye lu ai.

Ya na zawn Miwa jarit gunrai htaw shalai masa masat kau ai majaw Hkainu Sun, Hpa Hka Sun galaw ai masha grai yawm wa sai lam chye lu ai.

Shiga - Htu Seng