Myen Asuya Magam Gun Ni Hpe Shata Shabrai Shatsaw Ya Ai Lam

Pajau Media

October 1, 2025

Ya aten Asuya magam gun taw ai ni hte aten ladaw htum mat nna hkring sa mat sai magam gun dingsa yawng hpe October praw 1 kaw nna garum madi ai gumhpraw Gabaw hte shata shabrai hpe Mun masum (30,000) jat ya ai lam chye lu ai.

Dai sha n-ga lani mi na bungli manu shabrai hpe mung lani mi hta 7,800 jat jaw ai lam Asuya ja gumhpraw hte ahkun hkan se hte seng ai hkringmang rung kawn tara shang n dau da ai re hpe chye lu ai.

N dai garum madi gumhpraw gaw ya magam gun nga ai Asuya magam gun ni hte hkring sa mat sai magam gun ni yawng lu la mai ai re hte Asuya rung, Wuhpung Wuhpawng hkan shani ka-tum bungli hku shang galaw ai ni hpe mung bungli galaw aten hpe hkying hkum 8 masat nna bungli shabrai hpe 7,800 masat ai lam chye lu ai.

Ya na myen hpyen dap Asuya shata shabrai jat jaw ai lam gaw Asuya magam bungli galaw ai ni yawng hkam la na re hte Myen hpyen dap mungdan daru magam zing madu ai hpang kaw nna asuya magam gun ni yawng hpe shabrai jat jaw ai lam hpe 2023 ning hta kalang, 2024 hta kalang , 2025 hta num daw masum lang hku nna galaw ya ai re hpe mung chye lu ai.

Shiga- Hpring