Myen hpyen Dai hte SNA pawng Hpawm Dap ni Bamauk Muklum makau de du hkra Htu shadut nga dingyang re nga ai lam

Pajau Media

October 18, 2025

Myen Hpyen Dap SNA pawng hpawm hpung ni hte Rawt Malan Hpung ni lapran gasat gala majan gaw laja dingyang re hte Bamauk Muklum makau de du hkra gasat gala byin nga ai lam chye lu ai.

Myen hpyen dap hte pawng hpawm hpung ni gaw October 14 ya shani kaw nna Bamauk Muklum de du hkra htim gasat wa ai re lam, Rawt malan hpung ni maga kaw nna mung bai shingla gap ai majaw matut manoi gasat poi byin ai re hpe chye lu ai.

Dai sha n-ga Myen hpyen dap a Nbungli bawm, Laknak kaba gap ai lam ni a majaw Dum n ta n kau hten za ai hte Drone pyen gawan pyen hkawm ai lam mung dingyang naw re.

Bamauk Muklum hpe lai wa sai September 20 ya shani hta Rawt Malan Hpung ni htim gasat zing madu da ai rai nna SNA hte Myen hpyen dap gaw Homalin maga kaw nna Bamauk Muklum de htu shadut htim gasat wa ai re.

October 15 ya shani hta Mung Myen hpyen dap Jet Fighter langai hte Bamauk de Bawm lahkawng lang wa jahkrat ai lam chye lu ai.

Shiga - Htu Seng