Myen Hpyen Dap A Majaw Myen Mung Madang Hku Shata Mi Laman Mung Masha Latsa Jan Asak Si Sum Ai Lam

Pajau Media

September 3, 2025

Myen Mungdan ting madang hku rai uang shata mi laman myen hpyen dap a majaw Mung masa shamu shamawt nga ai masha ni hte Mung masha marai 139 asak si sum ai lam AAPP n dau da ai re.

N dai jahpan ni gaw mying hte hkrak lu la da ai jahpan ni rai nna naw shagrin la ra ai masha mung marai 185 nga ai lam tsun da ai re.

Asak si sum ai ni gaw nbungli a majaw marai 85, Laknak Kaba a majaw marai 24, gap sat hkrum ai marai 15, Katsing wan nat sat hkrum ai marai 3, Baw daw sat hkrum ai 1 nga ai lam, mabyin n pawt hpe n chye ai sha asak si sum ai marai 11 naw nga ai lam chye lu ai.

Jinghpaw Mung kata August shata mi laman hta Mung masha marai 14, laknak kaba hkra hkala asak si sum ai masha marai 53 gaw laknak hkra hkala nna asak si sum ai lam KHRW-Kachin Human Rights Watch kawn n dau da ai re.

September praw kaw nna daini aten du hkra myen hpyen dap gaw nbungli pyen gawai ai lam, drone pyen ai lam, laknak kaba gap bang ai lam shani shagu na lu dingyang rai nna Myitkyina kaw nna Waimaw maga de laknak kaba matut manoi gap bun nga ai re hpe mung chye lu ai.

Shiga - Htu Seng

Photo credit to AAPP