Myen Hpyen Dap Gap Dat Ai Laknak Kaba Mukchyik KBC Nawku Jawng Kaw Wa Hkrat Kapaw Ai Lam

Pajau Media

August 28, 2025

Waimaw Lamyang ginra de byin ai gasat gala majan hta Myen hpyen dap kawn gap dat ai Laknak kaba gaw Waimaw Washawng sa lam Nam Wa, Mukchyik KBC Nawku Jawng ntsa kaw wa hkrat ai majaw nawku jawng hten za mat ai lam ginra masha ni tsun ai re.

Myen hpyen dap gaw Waimaw Lamyang maga de n dai laman nbungli bawm wa jahkrat nna htu shadut htim gasat nga ai sha n-ga lagaw lam htu shadut ai lam mung laja lana galaw ai majaw gasat gala majan byin ai re hpe chye lu ai.

Myen hpyen dap a htu shadut majan a majaw n dai laman Myitkyina Muklum hta mung shani shagu sinat n sen ni na taw ai hte shimlam ni grau laja wa ai re lam ginra masha ni tsun ai.

 Dai sha n-ga Myen hpyen dap gaw Lamyang maga de August 26 ya jahpawt daw kaw nna Laknak kaba hte gap nna shani hkying 1 aten daram hta gaw Jet Fighter bawm wa jahkrat bun ai lam nga ai re hpe mung chye lu ai.

Shiga - Hpring