Myen Hpyen Dap Gaw Chyara Patti Ginra Maga De Jep Joi Ai Lam Grau Galaw Wa Ai Majaw Maja Let Hkawm Sa Ra Taw Ai Lam Ginra Masha Tsun

Pajau Media

December 15.2025

Myen Hpyen Dap gaw Myitkyina Ginra kata Lam braw Hkan kajawng kaja hkap jahkring san jep ai lam dingyang galaw ai hta Chyara Patti maga de mung aten hpring jep taw ai n rai tim hpyen mawdaw hpe lam kaw jahkring nna wa jep jep re ai majaw myit tsang let sha hkawm sa ra ai lam Ginra masha langai tsun ai.

"Shanhte gaw dai shara kaw sha aten tup nga taw ai gaw n re, Myit lu yang lu ai hku Hpyen Mawdaw hpe lam kaw jahkring da nna jep joi ai, dai aten lai hkrup ai ni hpe gaw atsin ayang jep ai, hkawm sa ai masha ni hpe Mung Chying masat lawm ra na, Hpung magam gun ni mung Hpung sara card lawm ra ai, n lawm yang n mai ai nga na tsun ai" nga nna Myitkyina Ginra masha tsun ai.

Muklum kata hkawm sa nga tim aten hpring maja let sha hkawm sa ra ai sha n-ga ya na zawn kajawng kaja jep shatsang ai majaw Ginra Mung masha ni a matu grai dut dang ai re hpe chye lu ai.

Shahte gaw n tsen n hten ai ni hpe sha hkap jahkring ai hku n re sha lai sa masa Mung masha yawng hpe hkap jahkring ai re lam, Nawku Jawng sa ai ni hpe du hkra jep joi ai re.

Ya aten myen hpyen dap gaw Myitkyina Ginra kata hta Mungdan kata asak ram sai ni hpyen magam n gun n mai ngu ai Upade hte Ramma ni hpe rim lahkawn nga ai aten mung re majaw jut shagu hta jep joi shara la hkawm nga ai re hpe chye lu ai.

Myitkyina Ginra kata Myen hpyen dap jep joi ai lam law dik gaw Chyara Patti, Hti Win sha n-ga, Bala Min Htin mahkrai, PLN shagyit, PLN lahta tsang jawng lam braw, Nawng Nang Ying Hkaw lam braw hkan gaw dingyang ngu na hep joi ai re majaw Mung shawa ni sadi maja let hkawm sa ra ai lam ginra myitsu salang ni tsun da ai re.

Shiga - Pyilan U