Myen Hpyen Dap Gaw Gap Hkat Jahkring Ai Lam Ndau Da Ai Raitim Laknak Kaba Nbugnli Bawm Htim Gasat Ai Lam Ni Dingyang Galaw Nga

Pajau Media

June 4.2025

Myen hpyen dap gaw gap hkat jahkring ai lam n dau da ai aten raitim Jinghpaw mung sha n-ga Myen mungdan kata laknak kaba nbugnli bawm htim gasat ai lam ni dingyang galaw nga dingyang re.

Jinghpaw mung kata May shata hpang jahtum na laban bat mi laman hta sha Manmaw ginra sha n-ga rawt malan hpung ni shamu shamawt nga ai ginra ni de Y-12 nbungli bawm 42 lang, Jet fighter 7 lang, Drone bawm hte 80 jan lang, laknak kaba 290 jan lang daram gap gasat nga dingyang re lam KIA shiga kawn sawk kahkyin tang madun da ai kaw na chye lu ai.

KIA pawng hpawm hpung ni kawn Manmaw muklum zing madu lu na matu lai wa sai 2024 December kaw nna htu shadut majan hpang wa ai gaw ya aten du hkra majan laja nga dingyang re.

Myen hpyen dap gaw Manmaw ginra htim gasat majan hta nbungli, Drone ni ladu lai jai lang ai sha n-ga hpyen ninggang grai shagreng da ai re majaw Manmaw ginra hpe aten na na htim gasat ra ai re lam shawng lam shi sawk ni tsun ai re.

Manmaw ginra htu shadut majan baw ai shata 6 daram na wa sai hte KIA pawng hpawm hpung ni kawn Manmaw muklum kata na Myen hpyen dap shara sha n-ga Ts.K.Hk 21 makawp ai Post kasha ni law malawng hpe zing madu la lu sai re.

Matut nna dap kaba rai nga ai Ts.K.Hk 21 zing madu lu na matu matut manoi shakut nga dingyang re. Myen hpyen dap gaw Myen munggdan kata shingra hpyen a majaw hten za mat ai shara ni hpe gaw gap lu na matu mungdan ting gap hkat jahkring ai lam hpe June 30 du hkra masat ai lam n dau da ai re.

Gap hkat jahkring n dau ai aten raitim rawt malan hpung ni uphkang ginra kata na hpaji jawng ni hkan du hkra nbungli bawm htim gasat ai lam grau galaw wa ai majaw ya aten NUG uphkang ginra kata na hpaji jawng ni yawng hpe aten n masat gan pat da ra ai madang byin nga ai re hpe mung chye lu ai.

Shiga- Pyilan U