Myen Hpyen Dap Gaw Hkrun Lam Hkawm Mung Masha Ni Hpe Laja Lana Jep Joi Wa Ai Majaw Hkrun Lam Hkawm Mung Masha Ni Myit Tsang Nga Ai Lam

Pajai Media

September 17, 2025

Myen hpyen dap gaw Jinghpaw Mung kata hpyen gasat ai lam hpe grau laja hkra galaw nga ai hta maga mi de hkrun lam hkawm Mung masha ni hpe jep joi ai lam ni shawoi na hta grau galaw wa ai re nga nna hkrun lam hkawm mawdaw la ni tsun ai kaw na chye lu ai.

N dai laman Danai hkawm sa hkrun lam hta mung Mung masha ni hpe jep joi ai sha n-ga Mawdaw kaw htaw wa ai arai ni hpe du hkra n hkyi hte achyaw nna jep ai lam Danai mawdaw la ni tsun ai re. Hkrun lam ntsa Mung Chying masat hpe madung jep wa ai gaw CDM galaw ai masha ni hpe jep joi nna rim mayu ai majaw re lam hkrun lam hkawm Mung masha ni tsun nga ma ai re.

Danai sa lam Deng (21) shagyit hta gaw phone ni hpe du hkra ahkraw jep ai re sha n-ga Mung Chying masat ni hpe madang tsaw ai jak rai hte atsin ayang jep joi ai lam, dai shagyit kaw CDM galaw ai masha ni hpe jep joi rim ai lam ni galaw nga ai majaw n dai laman hkrun lam hkawm ai Mung masha ni grai sadi maja let hkawm sa ra ai lam chye lu ai.

Danai lam mayan de jep joi ai lam hpe September praw daram kaw nna grau laja wa ai re lam chye lu ai. N dai laman Myitkyina Waimaw matut da ai Balamin Htin mahkrai kaba hta mung Balik, Hpyen la, Mawdaw Cycle gawn hkang ai ni mung lawm rai nna masha n-gun grau jat n htawm grau jep joi wa ai re.

 Shawoi gaw ntsen nhten na zawn re ai La ni hpe madung jep joi ai raitim n dai laman amyu shayi ni hpe mung hkap jahkring nna Cycle Tool Box ni hpaw jep joi ai lam ni grai galaw wa ai re hpe mu chye lu ai.

N dai laman gaw Myitkyina Muklum kata lam braw hkan mung aten hpring tsap nna jep ai hku n rai tim aten n tam shara la nna hkap jahkring jep ai lam ni grau galaw wa ai majaw Mung masha ni myit tsang let sha hkawm sa ra taw ai lam chye lu ai.

Shiga - Pyilan U