Myen Hpyen Dap Gaw Hpyen Gasat Ai Hta Sum Machyi Ai Hte Tat Sum Kau Sai Shara Hkan Nbungli Bawm Wa Jahkrat Ai Lam

Pajau Media

October 9, 2025

Jinghpaw Mung gasat gala majan hta Myen hpyen dap gaw Nbungli hpe madung jai lang htim gasat ai re hte October 8 ya shana daw hkying 3 grup yin kaw Ga Ra Yang mare Lawu Pri Pra kaw Nbungli bawm lahkawng wa wa jahkrat ai lam nga ai.

“ Mani hkying masum daram kaw na re, Lamyang kaw jahpawt daw grai gasat ai hpang sum machyi ai hte hkrup mara wa gap ai ga rai nga, Nbungli wa gap ai shara gaw moi shanhte nga lai wa ai Hpyen dap dingsa re, 2024 htu shadut majan hpang tat kau da ai re, ya dai hkan rawt malan hpung ni shara nga ai re, kaga hkra hkala ai gaw n na lu ai ” nga nna dai ginra masha tsun ai.

Myen hpyen dap gaw 2024 hpang daw kaw nna byin ai gasat gala majan hpang tat sum kau ai shara bai lu la hkra htu shadut htim gasat ai re hte bai nlu la yang jahten kau na ngu ai masing hte Nbungli bawm hkrup mara jahkrat ai lam ni galaw nga ai re nga nna Mung masha maram nga ai salang ni tsun da ai re.

Myen hpyen dap Nbungli bawm a majaw mara kata Mung masha si hkala hkrum ai lam byin law nga ai re. Shalawt da sai ginra kata hpaw da sai Jawng ni hpe mung Nbungli hpyen hkrit tsang ra ai majaw ya du hkra naw pat da ai lam mung chye lu ai.

Myen hpyen dap gaw ya aten gasat gala majan byin ai shara hkan sha n-ga KIA Dap Ba shara shagu ngu na de Nbungli bawm jahkrat bun ai majaw grai sadi maja ra ai lam KIA shiga magam dap lit hkam kawn mung tsun da ai lam nga ai hpe chye lu ai.

Shiga- Pyilan U