Myen Hpyen Dap Gaw KIA Dap Ba Ginra Ni Hpe Masat Shingte Tawn Nbungli Bawm Jahkrat Bun Ai Lam

Pajau Media

October 28, 2025

Myen hpyen dap gaw n dai laman Jinghpaw Mung ginra kata Waimaw, Manmaw, Hpakant ginra sha n-ga gasat gala n byin ai Dap ba ginra hkan du hkra Nbungli bawm dingsa gasat ai lam grau galaw wa ai re hpe chye lu ai.

Lai wa sai bat laman hta mung Jinghpaw Mung kata gasat gala majan 42 lang byin ai lam nga ai re hte gasat gala n byin ai aten raitim Nbungli, Laknak kaba hte Drone bawm ni dingyang htim gasat nga ai re hpe chye lu ai.

Ya na zawn htim gasat ai hta bat mi laman Nbungli Bawm 66 lang Jahkrat bun ai lam, Drone Bawm 54 lang lahta, Laknak kaba 514 lang daram htim gasat ai lam KIA, KIO shiga hta n dau da ai re hpe chye lu ai.

Manmaw Hpyen man ginra de mung matut manoi Myen hpyen dap htu shadut ai majaw bat mi laman gasat gala 26 lang byin ai lam, Waimaw Ginra de mung ninghkap majan 4 lang daram byin ai lam, ya aten du hkra Manmaw, Waimaw Ginra de Lagaw lam htu shadut dingyang re majaw gasat gala majan matut laja dingyang re hpe chye lu ai.

Myen hpyen dap gaw Ra lata poi aten ladaw ni gahtep wa sai hte maren Jinghpaw Mung kata gasat gala n nga ai KIA Dap Ba ginra ni hkan du hkra Nbungli htim gasat nga ai re hte October 26 ya shani Dap Ba 1 Ginra Putao Machyang N Hka Ga de mung Nbungli Bawm 8 lang, Dung 7 ginra de mung Nbungli Bawm 30 lang, N jang Yang ginra de mung Nbungli Bawm 6 lang wa jahkrat bun ai re hpe chye lu ai.

Myen hpyen dap Nbungli Bawm Jahkrat bun ai ginra ni gaw gasat gala majan laja ai lam n nga ai re hte masing nga nga hte Nbungli Bawm hkan jahkrat ai masa re lam Mung masa maram nga ai ni tsun ai re.

Shiga - Pyilan U