Myen Hpyen Dap Gaw Lai Wa Sai December Shata Mi Laman Nbungli Hte Gap Gasat Ai Majaw Mung Masha Marai 200 Hkawt Asak Si Sum Ai Lam

Pajau Media

January 15, 2026

Myen Hpyen Dap gaw lai wa sai 2025 December shata laman shinggyim ahkaw ahkang tawt lai ai mabyin 550 jan lang nga sai hte Nbungli htim gasat ai lam mung 262 lang du hkra laja lana grau galaw wa ai re lam NUG asuya shinggyim ahkaw kang hkring mang rung kawn n dau da ai kaw na chye lu ai.

Lai wa sai December shata laman hta sha Myen Hpyen Dap n bungli htim gasat ai majaw ma kaji ni mung lawm yang mung masha marai 198 asak si sum nna marai 375 hkala hkrum ai lam chye lu ai.

Myen mungdan ting n bungli htim gasat ai lam gaw 2025 htum wa maga kaw nna grau grau laja wa ai re lam, Myen Mungdan ting kaw nbungli gap gasat ai lam 260 jan nga ai kaw nna sawng dik gaw Sagaing ginra re hte Sagaing ginra kaw 79 lang nbungli gap gasat hkrum ai lam, dai hta mung masha marai 81 asak si sum ai kaw ma kaji mung marai 6 lawm ai re lam chye lu ai.

Dai sha n-ga Rahkai mung hta mung ma kaji marai 5 mung lawm yang marai 54 asak si sum ai lam nga sai re hpe chye lu ai. Mung masha dum nta, hpaji jawng hte makam masham nawku jawng zawn re ai ni hpe masing nga nga hte galaw nga ai lam, mung masha hpe shinggyim ahkaw ahkang tawt lai ai masa lam ni hpe sak se hte hkrak matsing da nna Myen Hpyen dap hpe ahkyak la lu hkra shakut sa wa na re lam NUG shinggyim ahkaw ahkang hpung ni tsun ai lam nga ai re.

December shata laman hta nbungli bawm a majaw Bukda makam masham hte seng ai nta 21, Hkritsatan makam hte seng ai nta 3, Hpaji Jawng 15, mung masha dum nta 317, hkamja lam hte seng ai nta 4 hten za ai lam nga sai re hpe mung chye lu ai.

Myen hpyen dap gaw ntsa lam hku htim gasat ai lam laja lana galaw ai majaw mung masha wunawng hku kalang ta asak si sum ai lam ni, hkala hkrum ai lam lang hte lang byin nga ai rai nna 2026 shaning n nan kaw nna mung Myen Mungdan ting nbungli htim gasat dingyang re majaw mung masha asak si sum, hkala ai mabyin dingyang ngu na byin nga ai re hpe mung chye lu ai.

Shiga – Pyilan U