Myen Hpyen Dap Gaw March Shata Laman Amyu Shayi Marai (88) Hpe Sat Wa Ai Lam.

Pajau Media

April 8, 2026

Gumshem Myen Hpyen dap a nbungli bawm hte gasat gala majam a majaw myen mung ting hta lai wa sai March shata mi laman hta amyu shayi marai (88) asak si hkrum nna, marai (54) hkra hkala ai hpe Burmese Women Union (BWU) hku nna ndau da ai re.

March shata laman amyu shayi asak si sum ai lam law htum mabyin gaw March (15) ya shani Bago ginra Nyaunglebin muklum kata Yetwinkon, Kayukon hte jawng kawng mare na mung shawa ni hpe hpyen dap ni kawn rim la nna sat kau ai mabyin nga lai wa sai re, dai mabyin hta amyu shayi marai (17) du hkra lawm ai re hpe chye lu ai.

Amyu shayi ni asak si sum ai mabyin hta nbungli bawn gap gasat ai majaw marai (57), ntara ai hku sat hkrum ai majaw marai (21), wan nat sat hkrum ai majaw marai (4), laknak kaba a majaw marai (3), roirip hkrum ai majaw marai (1), tsi tsi hkam la ai majaw marai (1) hte hkam bawm gabye hkrum ai majaw marai (1) re hpe chye lu ai.

Dai hte maren hkra hkala ai hta nbungli bawm a majaw marai (48), hkam bawm a majaw marai (4), laknak kaba a majaw marai (1) hte sinat a majaw marai (1) re.

Dai hta n-ga asak si sum ai hta asak (18) ning lawu amyu shayi marai (20) hte asak si sum ten ma hkum hte re ai amyu shayi marai (3) lawm ai hpe chye lu ai.

Gumshem hpyen dap gaw tara nshang ra lata poi galaw nna asuya langai hku matsing masat hkrum lu na matu rapdaw shaga ai ni, gumsan magam lata shatsam ai ni galaw nga ai rai tim, maga mi hta gaw mungdan kata nbungli bawm gasat ai ni, mung shawa law law hpe rim sat ai ni, adip arip zingri ai ni matut manoi galaw nga ai hpe (BWU) kawn ndau da ai.

Shiga-Htu Seng

Sumla - BWU