Myen Hpyen Dap Gaw Mung Masha Ni Hpe Masat Shingte Tawn Nna Laknak Kaba Shani Shagu Gap Bun Nga Ai Lam

Pajau Media

September 9, 2025

Jinghpaw Mung Hpakant ginra hta hpyen n-gun htu shadut nna shara jahkrat nga ai myen hpyen dap gaw n dai laman gasat gala majan byin ai lam n nga tim Mung masha ni nga ai shara de masat shingte nna laknak kaba gap bun ai lam, drone bawm jahkrat ai lam jahkring hkring galaw nga ai re.

Ginra masha langai tsun ai hta “ lai wa sai shana hkying 12 jan aten hta Seng Tawng lawk 3 maga de laknak kaba hkrat ai, Num kasha langai hte la langai hkala sawng ai, ngut na Miwa Nawku jawng makau kaw mung hkrat ai, Hpaji jawng asawng maga de mung hkrat ai, Mg U Dum Su Lawk kaw mung hkrat ai, Dum su lahkawng si mat ai, ngut na hkau soi seng makau kaw mung wa hkrat ai, dai pyi anhte chye ai daram sha re ” nga nna tsun ai re.

Dai sha n-ga muklum kata hpyen n-gun kaba htu nga ai aten hta mung hkawm sa hkawm wa Mung masha ni hpe mara kata rim woi mat ai lam, sinat gap shadam ai lam ni mung jahkring hkring galaw nga ai re hpe mung chye lu ai.

Lai wa sai shana hkying 12 jan aten kaw nna jahpawt du hkra laknak kaba gap bun ai rai nna muklum kata lawk n kau hkan laknak kaba wa hkrat ai majaw mara kata Mung masha si hkala hkrum ai lam ni law wa nna Hpakant ginra masha ni grai hkrit tsang nga ma ai re hpe mung chye lu ai.

Shiga - ND