Myen Hpyen Dap Gaw Ndai Laman KIA Dap Ba Shagu Ngu Na De Hpyen N-Gun Jat, Hpyen Shamu Ai Lam Galaw Wa Ai Lam

Pajau Media

January 21, 2026

Myen Hpyen Dap gaw ra lata poi daw 3 galaw na aten ni wa magang Jinghpaw Mung kata KIA dap ba shagu ngu na de hpyen n-gun jat hpyen shamu ai lam grau galaw wa ai hta Masat 1 Dap Ba Dung (7) ginra de mung n dai laman Myen Hpyen Dap n-gun tsa lam htu shadut ai lam chye lu ai.

Dap Dung (7) ginra Putao Htang Ga hpyen man maga de mung Myen Hpyen Dap n-gun 200 grup yin htu shadut wa ai sha n-ga Machyang baw ginra Shinggai Yang maga kaw nna mung mawdaw kaba ni hte hpyen n-gun jat bang nga dingyang re lam ya na zawn hpyen n-gun jat shamu shamawt ai lam galaw wa majaw majan laja wa na masa nga ai lam ginra masha ni tsun maram nga ma ai re.

N dai laman KIA Dap Ba shagu ngu na de hpyen n-gu jat hpyen shamu nga ai sha n-ga laknak kaba, drone bawm ni mung dingyang gap bun nga ai re hpe mung chye lu ai. KIA masat (7) Dap Ba ginra rai nga ai Hkawng Lang Hpu ginra de mung hpyen masa grai shaja hkat nga dingyang re lam mung chye lu ai.

KIA Masat (3) Dap Ba ginra Manmaw Deng (3) hte KIA pawng hpawm hpung ni shara la da ai ginra hkan gasat gala majan shani shagu byin ai hte Ts.K.HK 21, HK.L.Y (236) kaw nna mung drone bawm, laknak kaba dingyang gap gasat ai re hpe mung chye lu ai.

Dai sha n-ga KIA Masat (5) Dap Ba ginra Waimaw Hpyen man de mung n dai laman myen hpyen dap hpyen n-gun laja lana htu shadut nga ai sha n-ga January 20 ya jahpawt hta mung gasat gala majan byin ai lam nga ai hte laknak kaba matut manoi gap bun ai nsen ni ngoi gara nga ai re hte January 21 dai ni hkan du hkra laknak kaba n sen ngoi dingyang re lam ginra masha tsun ai kaw na chye lu ai.

Myen hpyen dap gaw zing madu da sai uphkang masa hpe matut jum tek na matu ra lata poi galaw ai aten ladaw raitim Jinghpaw mung sha n-ga Myen mungdan kata htim gasat majan gaw zim ai lam n nga grau grau laja wa ai re hte n bungli htim gasat ai lam, drone bawm, laknak kaba ni hpe madung jai lang htim gasat majaw mara kata mung masha si hkala hkrum ai lam grau grau law wa ai re hpe mung chye lu ai.

Shiga – Pyilan U