Myen Hpyen Dap Gaw Ra Lata Poi Galaw Na Matu N mai Byin Ai Ngu N dau Da Ai KIA Uphpang Ginra De Nbungli Bawm Wa Jahkrat Bun Ai Lam

Pajau Media

30 December 2025

Jinghpaw Mung ginra n kau hta ra lata poi galaw nga ai re hte ra lata poi n lu galaw ai lam n dau da ai KIO uphkang ginra rai nga ai Njang Yang de nbungli bawm wa jahkrat ai lam chye lu ai.

December 28 ya shani kaw nna Myen Mungdan kata Ra lata poi daw 1 hpe galaw nga ai raitim maga mi de Myen Hpyen Dap gaw gasat gala majan baw ai lam, KIO uphkang ginra de nbungli bawm jahkrat bun ai majaw mung masha hkala hkrum ai lam, dum n ta wan hkru hten za mat ai lam ni byin nga ai re hpe chye lu ai.

December 28 ya shanna hkying 9 aten daram hta Njang Yang Ginra rai nga ai Tangbau Yang mare kaw nbungli bawm wa jahkrat majaw dum nta 2 wan hkru hten za mat nna mung masha marai 4 hkala hkrum ai lam nga ai lam chye lu ai.

Dai sha n-ga Tang Hpare mare lahta kaw dap jung ai Myen hpyen kawn mung laknak kaba gap shadam ai lam ni nga ai re hpe mung chye lu ai.

Myen Hpyen Dap gaw gasat gala majan hta sum machyi ai lam nga wa shagu KIO uphkang ginra de nbungli bawm jahkrat bun ai lam ni dingyang ngu na galaw ai hta Njang Yang ginra de nbungli bawm jahkrat ai lam gaw shawng ning nan lang re lam chye lu ai.

N jang Yang ginra hpe gaw lai wa sai 2023 shaning hta KIA kawn htim gasat n ra ai sha dai ginra kata na Myen Hpyen Dap, asuya rung ni yawng ngu na daram gaw dawng hkawn ahpraw sharawt nna htingnut mat ai hpang KIO uphkang sai ru hte uphkang nga ai ginra langai re hpe mung chye lu ai.

Shiga - Pyilan U