Myen hpyen dap gaw Shanglawt Uphkang ginra hpe masat shingte tawn gasat wa ai lam

Pajau Media

October 23, 2025

Kade n na ai ten Myen Mungdan ting madang ra lata poi galaw sa wa na matu Myen hpyen dap shajin nga ai raitim Jinghpaw Mung Shanglawt uphkang ginra hkan masat shingte tawn tim gasat ai lam matut galaw nga ai re.

N dai laman gasat gala majan n nga ai Shanglawt uphkang ginra hkan Nbungli bawm jahkrat ai ni grau grau galaw wa ai re. Gasat gala n byin ai ginra hkan kajawng kaja Nbungli bawm wa jahkrat ai lam lang hte lang galaw wa ai majaw Shanglawt uphkang ginra kata Myen hpyen dap a lagaw lata tai ai masha ni shiga jaw masa nga ai lam tsun maram nga ma ai hte Shanglawt ginra n kau hta Starlink Wifi jai lang ai lam ni hpe mung aten masat nna galaw ai lam ni nga wa ai re hpe chye lu ai.

" Yahte anhte maga de gaw Starlink Wifi hpe masum ya ram pat kau ra ai, shiga jaw ai majaw nga gaw tsun ai, ya ma shana hkying 9 kaw na gaw pat kau sai, kalang lang drone ni pyen wa wa re dai ten hkan ma pat ai " nga nna Myitkyina Laiza lam shanglawt uphkang ginra kata shanu nga ai Mung masha langai tsun ai re.

Myen hpyendap kawn Jinghpaw Mung sha n-ga Rawt malan hpung ni shamu shamawt nga ai ginra hkan Internet Phone line ni dawm kau ai hpang Starlink wifi jai lang ai lam grai dam lada wa ai re.

Ya na zawn Rawt malan ginra hta Starlink jak jai lang ai lam dam lada wa ai hte maren kata lam shiga ni grai brawng lawan ai sha n-ga myen hpyen dap gaw Rawt malan hpung ni shamu shamawt nga ai ginra ni hpe masat shingte htim gasat ai lam ni law wa ai re nga nna Rawt malan Ginra hkan Starlink Wifi jai lang ai lam hpe aten masat gawn hkang ai lam ni galaw wa ai re hpe mung chye lu ai.

N dai laman Myen hpyen dap gaw Hpakant ginra, Waimaw ginra, Manmaw ginra hkan sha n-ga gasat gala n nga ai Lang Se, Sadung zawn re ai ginra hkan Nbungli bawm jahkrat ai lam grai galaw wa ai majaw Mung masha asak si sum hkala hkrum ai shani shagu ngu na daram byin nga ai re.

Shiga - Pyilan U