Myen Hpyen Dap Gaw Upadi N Nan Hpe Hkrang Shapraw Galaw Ai Hta Mare Salang Ni Lit La Nna Mungdan Shara Shagu Hta Laja Lana Galaw Nga

Pajau Media Channel

25th March,2024

Myen mungdan kata nga Mungdan masha shagu hpyen magam gun na Upadi Myen hpyen dap shagrin dat ai hpang mying jahpan hta rim lahkawn ai lam ni galaw nga sai re hte Indawgyi ginra hta asak (30-35) lapran na ramma marai (25) hpyi da ai lam nga ai re hpe mung chye lu ai.

Myen hpyen dap gaw mare uphkang salang ni hku nna tinang uphkang ginra kata na ramma mying jahpan hta ai lam atik anang galaw hpang nga sai lam mare masha langai tsun ai hta “Mare kahtawng langai kaw nna marai lahkawng hku nna Indawgyi ginra kata na marai (25) hpyi ai lam nga ai re. Asak (30-35) lapran na ni gaw yawng ngu na daram dinghku de sai ni hkrai re. Ya na myen mungdan masa kaw nta dinghku gaw yak, ma lu ai ni hkrai re, hpyen magam gun na matu gara hku mai byin na,” nga nna ginra masha tsun ai re.

Myen hpyen dap kawn matsun ai hte mare salang ni mung masha jahpan hta madi madun ai lam ni grai galaw wa ai majaw mare salang ni hpe seng ang ai ginra nga shanglawt hpung (KPDF) ni kawn sadi jaw ai lam ni n dau wa ai majaw mare salang ni bungli shang na matu n gwi wa ai rai nna aten ntam lam ntsa hkan prang hkawm ai ni hpe sha madung rim na matu mare salang ni kawn myen hpyen dap hpe tsun da ai hte rim lahkawn ai lam ni galaw hpang nga sai re.

Mare salang ni kawn lam ntsa aten ntam hkawm sa nga ai ni hpe rim na matu ahkang jaw da ai hpang hkungran poi shang hkyen ai la n nan shan wa hte ramma lahkawng mung lawm rai yang marai 4 hpyen lahkawn hkrum ai lam ginra masha ni tsun ai re. Rim hkrum ai Masum ya daram na ai hpang la n nan na kawa hpe gaw dat ya ai. Hkungran poi shang hkyen ai la n nan hpe gaw n dat ya ai re lam ginra masha matut tsun dan ai. “La n nan gaw hkungran poi shang hkyen taw sai, hkung ran poi gaw March (25) ya shani re, ya aten du hkra n lu pru wa shi ai, shi hte rau rim hkrum ai asak (30) ning jan re ai lahkawng mung lawm ai, shahte ra ai asak pang rai nga gaw” nga nna rim hkrum ai masha ni hte ni nawn ai jinghku ni tsun dan ai re.

Myen hpyen dap kawn atik anang hpyen lahkawn mying jahpan hta ya ai lam hta garum ya nga ai mare uphkang salang ni hpe mung Lai wa sai March (17) ya shani KPDF kawn sadi jaw n dau laika shapraw da ai re hte ya aten shara n kau hkan gaw mare uphkang salang ni gyam sat hkrum ai lam ni nga ai re hpe mung chye lu ai.

Shiga - Kachin Pyi Tar