Myen Hpyen Dap Hkam Da Ai Hkam Bawm a Majaw Mare Masha Ni a Dumsu Nga ni Kapaw si ai lam

Pajau Media Channel

6th May, 2024

Putao, Lung sha Yang mare ka-ang kaw dap jung nga ai Myen Hpyen Dap Hk.L.Y 46 hte Hkawng Lang Hpu P.T.Ts pawng hpawm hpung ni kawn Myen Hpyen dap wang grup grup hkam bawm ni hkam da ai majaw mung masha ni a dumsu nga ni si hkala hkrum ai sha n-ga Kapaw mat ai bawm manu hpe bai du sat madu ni hku nna n htang jaw ra ai lam chye lu ai.

May praw 5 ya jahpawt hkying 8:00 AM daram hta mung Lung Sha Yang Myen hpyen dap makau de na bawm kapaw n sen grai ja hkra ngoi gara wa ai majaw mare ting hkrit kajawng mat ai re hte sagawn yu yang hkam bawm a majaw mare masha ni a Nga U Loi langai kapaw si ai lam chye lu ai. Ndai lam hte seng nna mare masha langai tsun ai hta “dai hpyen dap gaw jahkring hkring dai hku galaw ai re, mare uphkang salang ni kawn mung lang hte lang hpyi shawn sai, raitim n hkap la ai, ladu nan lai,mani mung Nga langai kapaw si ai, kadai na Nga U loi re mung n chye laning mi hta n dai hku Nga dumsu ni kapaw si gaw 10 lahta nga ai ” nga nna tsun ai re.

Myen hpyen dap gaw Lung Sha Yang mare ka-ang kaw nan dap jung shara jahkrat nga ai sha n-ga shimlam ga baw hte Myen hpyendap makau mayan grup grup hkam bawm ni hkam tawn da ai hta ya na zawn Mung masha ni a Dumsu Nga ni kapaw si ai re lam chye lu ai. Myen hpyen dap ni gaw kapaw si ai du sat madu hpe lu hkra tam sagawn la nna kapaw mat ai bawm manu bai wa shangun ai zawn re ai ni galaw ai re lam nga nna Lung Sha Yang mung masha ni hta byin nga ai mabyin masa hpe ginra masha matut tsun dan ai.

“Myen hpyen dap gaw mare ka-ang kaw nan hpyen dap jung nna makau mayan de bawm hkam da ai, Nga Dumsu ni gaw gabye kapaw si sai gaw , dai pyi n-ga, Nga madu hpe lu hkra sagawn la nna kapaw mat ai bawm manu bai wa shangun ai, dai pyi kaji kajaw sha nre sen hkun lahta wa shangun ai, tinang na du sat mung sum mat, gumhpraw mung bai wa ra re ai majaw kadai mung n gwi sagawn la ai, Myen hpyen dap gaw kaja nan grai zingri ai ga rai sai ” nga nna Hkam bawm kapaw manghkang byin ai makau de nga ai Mung masha langai tsun wa ai re.

May praw 5 ya shani bawm kapaw si ai Nga U loi hpe myen hpyen dap kawn mung masha lai wa lai sa law ai lam maw ntsa de garawt da nna Nga U loi madu sagawn na matu mare ting hpe tsun shana da ai lam nga ai re hpe mung chye lu ai.

Shiga – Mali Hku