Myen Hpyen Dap Hku Nna Madang Tsaw Lak Nak Jai Lang Ai Majaw Manmaw Ginra Hpe Aten Na Na Htim Gasat Ra Ai Re Nga Nna Mung Masha Maram Masam Nga Ai Ni Tsun

Pajau Media

July 25.2025

Jinghpaw Mung kata gasat gala majan gaw lani hte lani laja nga ai re hte Manmaw ginra hpe htim gasat ai mung shata (7) daram na wa sai rai nna ya na zawn aten na na htim gasat ra ai gaw Myen hpyen dap maga na madang tsaw ai Jak hpaji ni hte hpyen gasat Jak arung arai ladu lai jai lang ai majaw re nga nna shawng lam shi sawk ni kaw nna chye lu ai.

“ Manmaw de n dai laman zim ai zawn raitim madung gaw Drone, lak nak kaba ni dingyang gap ai, Lak nak kaba gaw shanhte gap dat anhte gap dat rai nga, shanhte lang ai Drone ni gaw grai madang tsaw ai, anhte lang ai hte gaw n mai shingdaw ai, anhte na gaw madang nau n nga le tsun ga nga yang, Drone pyen ai pyi mu n mu re ai kaw pyen na kalang ta bawm jahkrat bun ai, Jai lang ai Jak hpaji ni gaw grai madang tsaw ai” nga nna Manmaw ginra shawng lam shi sawk tsun dan ai re.

Myen hpyen dap gaw Myen mungdan ting hta shara law law tat sum kau sai re majaw tat sum kau ai ni hpe bai lu la hkra htim htu shadut htim gasat ai hta July shata laman shanhte tat sum kau da ai Sam Mung Nawng Cho, Mu Pye (မိုးဗြဲ ရှမ်းပြည်တောင်ပိုင်း) , Mandalay ginwang kata na သပိတ်ကျင်းမြို့ ni hpe myen hpyen dap bai zing madu la lu sai re lam chye lu ai.

Ya na zawn rawt malan hpung ni zing madu da ai shara ni hpe Myen hpyen dap bai lu la wa ai gaw madung ra ahkyak nga ai masha n-gun hpe Hpyen magam n-gun n mai ngu ai tara Upade a majaw sha n-ga Myen hpyen dap gaw shiga shimlam hpe grai sadi wa ai, n bungli kaw nna lang hte lang kyin yu nna she Bawm jahkrat bun ai lam ni galaw ai nga nna Myen hpyen dap hpyen masa maram masam nga ai ni Myen mung shiga dap ni hkan tsun da ai kaw na chye lu ai.

Myen hpyen dap gaw N dai hpang daw de Madang tsaw ai Jak hpaji jai lang ai lam n-gun kaba wa ai majaw re sha n-ga ginra langai hpe tat sum kau ai hte gara hku bai lu la hkra ngu ai matsing masa kaba ni hpe atsawm jahkrat nna galaw wa ai majaw re lam mung tsun da ai re.

Rawt Malan Hpung ni maga gaw lamu Ga hpe htim gasat zing madu da lu ai raitim Uphkang masa hta ra rawng lam law law naw re sha n-ga hpyen gasat madang tsaw Jak hpaji gin shalat, shaman shakyang ai lam hta mung aten langai la ra ai re majaw n-gun kaba ai Myen hpyen dap htu shadut htim gasat majan hpe ninghkap gasat na matu grai n-gun dat galaw ra ai masa re nga nna Mung masa maram nga ai salang ni tsun da ai hpe shiga hta tang madun da ai.

Ya aten Myen hpyen dap gaw Jinghpaw mung Hpakant ginra de gasat gala majan laja nga ai sha n-ga Manmaw ginra, Myitkyina, Waimaw Ginra ni hpe Hpyen man hpaw nna n-gun kaba hte kalang ta htim gasat na matu hkyen ai majaw Hka lam, N bungli lam hku nna hpyen n-gun Lak nak ni hpe htaw lahka nga dingyang re hpe mung chye lu ai.

Shiga- Pyilan U