Myen Hpyen Dap Hpyen N-Gun Htu Shadut Nna Shamu Hkawm Nga Ai Aten Mung Masha Ni Grai Sadi Maja Ra Ai Lam

Pajau Media

August 30.2025

Jinghpaw Mung kata shara shagu de Myen hpyen dap hpyen n-gun htu shadut htim gasat nga ai re hte Myen hpyen dap n-gun kaba hte htu shadut yan lung wa ai hpe pru yu hkawm ai lam n galaw na matu KIO Shiga Magam Dap Lithkam kaw nna tsun Hpaji jaw da re hpe chye lu ai.

Myen hpyen dap gaw Mung masha hte hpyen hpe garan gin hka ai lam n nga ai sha gap gasat nga ai re majaw Hpyen hpung ni shamu shamawt hkawm ai aten le yu ai lam, lagu yu ai lam ni n galaw na matu tsun ai re.

Myen hpyen dap gaw Hpyen hpung shamu hkawm ai aten hkan yu ai ni hpe n tsen n hten ai majaw sinat gap sat kau da ai lam ni, rim woi mat ai lam ni galaw ai majaw grau sadi maja ra ai lam chye lu ai.

Ya aten Manmaw, Wai Maw Lamyang ginra de sha n-ga Hpakant ginra de myen hpyen dap hpyen n-gun htu shadut htim gasat majan Laja nga dingyang re.

Laiwa sai August 25 ya hta mung hpakant Maw Si Zar maga kaw nna Hpakant Pyuha Kawng de htu shadut wa ai Myen hpyen hpung ni gaw hpakant shang wa ai Pan Tin mahkrai kaw Hpyen hpung ni hpe tsap yu ai ngu nna amyu shayi langai gap sat hkrum ai lam nga sai re.

Dai sha n-ga August 24 ya shani hta mung Hpakant ginra de htu shadut ai Myen hpyen hpung ni gaw Maw Si Zar Kaw na La marai 9 hpe rim woi mat ai lam chye lu ai.

N dai zawn re masa lam ni a majaw Myen hpyen hpung ni htu shadut shamu hkawm yang Mung masha ni grai sadi maja ra ai re hpe mung chye lu ai.

Shiga - Pyilan U