Myen Hpyen Dap Kawn Gap Hkat Gan Jahkring Ai Nhtoi Bai Jat Masat

Pajau Media

April23.2025

Myen mungdan kata nnang nawn a majaw hten za mat ai ni hpe bai gaw sharawt na matu Myen hpyen dap kawn gap hkat gan jahkring ai n htoi bai jat masat ai re lam n dau da ai re.

March 28 ya kaw nna byin ai nnang nawn a majaw Myen mungdan kata masha asak si sum ai lam, hten za sum machyi ai lam law law nga ai majaw April 2 ya kaw nna 22 ya shani du hkra gap hkat jahkring ai re. Myen hpyen dap bai n dau wa ai hta April 23 kaw nna 30 ya du hkra gap hkat gan jahkring ai nhtoi hpe bai jat ai lam n dau da ai re hpe chye lu ai.

April 2 ya kaw nna 22 ya du hkra gap hkat gan jahkring ai lam Myen hpyen dap n dau wa ai majaw KIO maga kawn mung April 22 ya du hkra jahking ai lam bai n dau wa ai re. Myen hpyen dap kawn gap hkat jahkring ai nhtoi bai jat ai lam hte seng nna KIO, NUG ni hku nna gaw ya aten du hkra hpa mung tsun ndau wa ai lam nnga shi ai re.

Myen hpyen dap gaw ya na zawn gap hkat gan jahkring ai lam n dau ai raitim Manmaw ginra hte Jinghpaw mung shara shagu hta lak nak kaba nbungli, Drone ni hte laja lana gap bun nga dingyang re lam chye lu ai.

Shiga- Hpring