Myen Hpyen Dap Kawn Hkawm Sa Hkawm Wa Lam Asak Masat Da Ai Majaw Tang Hpare Lahta Daw Kanbau Bungli Galaw Sha Mung Masha Ni Hkawm Sa Hkawm Wa Yak Ai Lam

Pajau Media

August 21, 2025

Myitkyina Muklum kaba hte Deng 28 tsan ai Tang Hpare ginra hta n dai laman gasat gala majan gaw n nga ai raitim Myen hpyen dap gaw hkawm sa hkawm wa lam hpe asak bang nna hkawm sa shangun ai majaw Tang Hpare lahta daw de kan bau bungli galaw lu galaw sha Mung masha ni grai yak hkak wa ai lam chye lu ai.

Myen hpyen dap dung ai Tang Hpare mayan hta Asak 18 ning lahta kaw nna 45 n pu na La Wa ngan ni hpe hkawm sa ahkang pat da ai re. Mung masa shuk shanut ai hte tam lu tam sha yak hkak nga ai lapran Mung masha ni gaw Ja htu ai magam bungli, Bum yi, Sun ni hpe galaw nna kan bau nga ai re.

Ya na zawn Myen hpyen dap kawn hkawm sa hkawm wa lam hta jep joi nga ai sha n-ga asak masat nna hkawm sa ahkang pat ai majaw Tang Hpare lahta daw ginra de Yi Sun galaw , Ja htu Ja shap magam bungli galaw sha ai Mung masha ni lai wa lai sa yak hkak nga ai re hpe mung chye lu ai.

Jinghpaw Mung kata Hpakant, Manmaw ginra de gaw Myen hpyen dap htu shadut htim gasat majan shani shagu ngu na daram byin nga ai re hte Tang Hpare ginra mayan gaw n dai laman hpyen masa zim taw ai masa raitim Myen hpyen dap jep shatsang ai majaw yak nga ai hpe ginra masha ni tsun ai re.

Tang Hpare ginra mayan hta Myen hpyen dap shagyit masum daram nga ai re hte lai wa lai sa masha ni kaw na shanhte nsen nhten ai masha ni hpe hkum hkrang masawp jep ai lam, Phone jep ai lam ni mung laja lana galaw nga ai re hpe mung chye lu ai.

Ya na zawn Myen hpyen dap kawn hkawm sa hkawm wa Mung masha ni hpe asak bang masat nna hkum pat ai lam galaw ai gaw shata mi daram rai wa sai re. Ya na zawn galaw ai majaw Tang Hpare lahta daw ginra hkan kan bau bungli galaw lu galaw sha masha ni sha n-ga hkawm sa hkawm wa Mung masha ni grai yak hkak nga ai re hpe mung chye lu ai.

Shiga - Pyilan U