Myen Hpyen Dap Kawn Hpakant Ginra De Hpyen N-gun Matut Manoi Jat Bang Nga Ai Lam

Pajau Media

August 23, 2025

Myen hpyen dap gaw n dai laman Hpakant ginra de hpyen n-gun jat bang ai lam matut manoi galaw nga ai re.

August 21 ya jahpawt hkying 8:30 Am aten daram hta mung Nam Ya mare kaw nna hpyen n-gun 100 daram gaw Hpakant maga de n gun jat shamu shamawt wa ai lam chye lu ai.

Dai hpyen hpung ni gaw August 20 ya shani Mogaung Ts.K.hk 3 kaw nna Nam Ya de du wa ai hpung ni rai nna Hpakant de bai matut manoi hpyen shamu lung wa ai re lam chye lu ai.

Lai wa sai May shata kaw nna Myen hpyen hpung ni gaw Hpakant ginra de n-gun kaba htu shadut lung wa ai majaw KIA pawng hpawm hpung ni hte shani shagu gasat gala majan byin ai gaw dai ni du hkra re hte gasat gala majan shaja hkat nga dingyang re.

Gasat gala majan hta Myen hpyen dap gaw Mung masha ni nga ai mare lawk ni de lak nak kaba gap bun ai majaw Mung masha asak si sum ai lam ni jahkring hkring byin nga ai re.

Shiga - Htu seng