Myen Hpyen Dap Kawn Htawng Masha Shalawt Ai Hta Jinghpaw Mung Hte Sagaing Ginra Kata Htawng Masha Lawt Wa Ai Lam N Nga Ai Lam

Pajau Media

December 11, 2025

Myen hpyen dap kawn pukma 505 (က) hte rim hkrum ai ni hpe shalawt ai lam galaw ai raitim Jinghpaw mung hte Sagaing ginra kaw na htawng masha ni hpe shalawt ya ai lam n nga ai re hpe Myen mungdan ting htawng masha hte seng ai hpung PPNM kawn tsun n dau da ai re.

2025 November 27 ya shani Myen mungdan ting kaw na pukma 505 (က) hte rim sharen da hkrum ai ni hpe ra lata poi hta Sinda Pa bang lu na ngu ai gabaw hte mara amu shabrai nna shalawt ai lam galaw ai hta myen mungdan ginra law malawng hkan na htawng masha ni lawt pru wa ai hpe mu ai raitim Jinghpaw mung hte Sagaing ginra hta gaw lawt pru ai htawng masha n nga ai hpe chye lu ai.

Jinghpaw mung myitkyina htawng, Mohnyin htawng ni hta htawng masha lawt ai lam n nga ai re . Myen hpyen dap gaw Mung masha ni hpe kam ai hku rim nna shahte kam ai hku gabaw shadut htawng bang ai lam ni galaw ai hpang bai shalawt ai lam ni galaw ai raitim rap ra ai lam hku n galaw ai, shalawt dat ai ni hpe bai rim ai lam ni galaw nga ai majaw gai sadi maja ra ai lam PPNM kawn mung tsun da ai re.

Shiga – Hpring