Myen Hpyen Dap Kawn Myen Mungdan Kata Upadi daw 505 (က) Hte Sharen Da Hkrum Ai Masha Ni Shalawt Ai Lam Galaw Ai Hta Daw Awng San Su Kyi N Lawm Ai Lam

Pajau Media

November 28, 2025

Myen mungdan kata sharen da hkrum ai Myen mung hpaji jaw salang Awng San Su Kyi hte mung masa bawng masha ni hpe lawan dat ya na matu mungkan mungdan hte shinggyim wuhpung wuhpawng ni hpyi shawn nga ai aten Myen hpyen dap mung masa amu ngu masat ai Upadi daw 505 (က) hte amu hpaw da hkrum ai ni, sharen da hkrum ai bawng masha ni hpe November 27 ya shani dat ya ai re hpe chye lu ai.

Ya na zawn htawng masha dat ya ai hta Upadi daw 505 (က ) hte amu hpaw da hkrum nna ya aten hprawng lawt nga ai ni hpe du hkra mara amu dawm kau ya ai lam ni galaw ai re. Raitim mung masa bawng masha law law gaw htawng kata kaw naw ngam nga ai re hte Myen mungdan hpaji jaw salang Awng San Su Kyi mung shalawt ai kaw n lawm shi ai re hpe mung chye lu ai.

Myen hpyen dap gaw ra lata poi mahkrun kata matut hkawm nga ai re hte ra lata poi hta Sindan Pa bang lu na matu yaw shada let ra lata poi galaw na shata mi daram ra ai kaw ya zawn htawng masha dat ya ai re lam chye lu ai.

 Upadi daw 505 (က ) hte amu hpaw sharen da hkrum ai masha ni hpe shalawt ai hta Myen mungdan madang hku rai yang marai 700 grup yin lawt wa ai rai nna ngam ai kaga mung masa bawng masha 2,000 jan gaw naw sharen da hkrum ai re hpe mung chye lu ai.

Myen mungdan kata Myen hpyen dap daru magam zing madu ai hpang kaw nna ntara ai hku rim hkrum ai masha Mun 3 jan nga ai kaw na mun 2 gaw naw sharen da hkrum ai rai nna ngam ai mun mi gaw htawng jahkrat hkrum ai re lam AAPP kawn ndau da ai kaw na chye lu ai.

Shiga – Pyilan U