Myen Hpyen Dap Kawn Rim Hkrum Ai Ramma Ni Hpe Gumhpraw Hte Shaw La Shangun Ai Shiga

Pajau Media Channel

10February2024

Myen dap uphkang wa ai hpang kaw nna Myen Hpyen Dap Hpung ni gaw Mung shawa ni hpe jep joi, rim shatsang ai lam ni dingyang galaw nga ai re hte Sagaing ginra Nat Mahuk mare masha lahkawng hpe mung Feb (1) ya shani rim woi mat nna gumhpraw Sen (30) hte shaw la shangun ai lam ginra masha ni tsun ai kaw na chye lu ai.

Dai rim hkrum ai ramma lahkawng gaw Mohnyin kaw nna nta de cycle hte wa ai hta Indaw Gyi ginra kaw Myen hpyen hpung ni hte hkrum katut nna rim hkrum ai re lam rim hkrum ai dum nta masha ni ya na zawn tsun dan ai re. “Feb (1) ya shani nye kanau hte shi manang gaw Mohnyin kaw nna cycle hte nta wa ai kaw rim hkrum ai re, myen hpyen la ni kawn hkap jahkring nna gara kaw nna wa ai, gara sa na nga san jep n htawm rim kau ai re, jawng ma re, jawng pat ai majaw nta wa ai ngu tim rim woi mat ai re” nga nna tsun dan ai re.

Rim hkrum ai lahkawng gaw asak (23) ning ram re ai Dakkasu jawng ma ni re lam mung chye lu ai. Rim hkrum ai yan gaw jawng ma ni re bai dat ya na matu sa hpyi nem ai raitim Gumhpraw hte shaw la shangun ai lam ya na zawn matut tsun dan ai re. “Shan lahkawng lam lapran kaw rim hkrum ai hpe mare kaw na masha langai mu dat ai, dai hpang sagawn yu yang bat mi daram na du hkra hpa shiga mung n na ai, mani hpawt hkan she shanlahkawng hpe rim tawn da ai shara ni hpe lu sagawn la ai,hkan sa nna shan lahkawng hpe dat ya na matu sa hpyi nem ai dai shaloi marai langai sen (30) hpra hte wa shaw la na matu tsun ai, Feb ( ya shani she lu wa shaw la ai re” nga nna mung tsun dan ai re.

Rim hkrum ai yan gaw mung masa hte seng nna gindun ai lam n nga ai raitim rim hkrum ai re hte dum nta masha ni hpe gumhpraw hte bai shaw la shangun ai, n dai masa gaw mung shawa hpe sharu shatsang ai lam re, mung shawa kaw nna gumhpraw mya la ai lam re nga nna mung masha ni tsun garu nga ma ai re. Ya aten Myen hpyen n-gun (60) daram nga ai hpung ni gaw hpyen lak nak hkum hkum zup zup hte Indaw Gyi ginra mayan hta hpyen shamu shamawt nga ma ai re lam mung chye lu ai.

Shiga Kachin Pyi Tar