Myen Hpyen Dap Kawn Sumpyi Yang Mare Masha Ni A Dum Nta Wan Nat Ai Lam

Pajau Media Channel

18th May, 2024

Myen hpyen dap kawn mung masha ni hpe hpyen ninggang shatai rim woi ai lam ni galaw ai majaw Sumpyi Yang mare masha ni hkrit tsang nna gan koi yen kau da ai aten myen hpyen dap kawn May 18 ya hkying 3:00 grup yin hta mung shawa dum nta wan nat kau ya ai re lam chye lu ai.

 “Myen ni gaw Wa dat mare masha ni hpe mung hpyen ninggang shatai na woi yu wa ai nga ai majaw anhte mung hkrit tsang nna nam de yen ai, kade n na yang shanhte mare kata de rut rai nna mare kata kam mara shalau taw sai, u wa du sat yam nga ni kam ai hku sat sha nta na arung arai ni yawng la kau rai, mare wan nat ya ai, ya n ta masum mung wan hkru mat ai anhte mung bai n mai wa yu le, mare kata kadai bai n nga re yang gaw nta gaw masum hkru sai ” nga nna hpyen koi yen nga ai Sumpyi Yang mare masha tsun ai.

Ya aten Sumpyi Yang mare grup yin hta gasat gala majan grai sawng ai lam gaw n nga ai, kalang marang lak nak kaba lahkawng maga kawn gap ai lam ni gaw nga ai re lam mung chye lu ai. Putao maga de na hpyen n-gun jat ai lam ni galaw nga dingyang re hte mare masha ni hpe hpyen ninggang shatai woi hkawm ai lam ni nga ai majaw Sumpyi Yang mare masha ni gaw Nam de koi yen ai May 11 ya kaw na rai sai re.

Sumpyi Yang mare masha ni yawng dum bri dum pra hprawng koi yen nga ai re hte n kau gaw lu na sha na pyi n lawm ai re lam, hpyen koi yen mung masha ni hpe shara mi kaw gahkyin lu hkra gaw shakut nga ai lam mung chye lu ai.

Asak kaba sai gumgai dingla ni lawm ai hte n kau gaw machyi makaw lam ni, hkawm sa htawt sit n ngut ai ni mung lawm ai re majaw ya aten na masa gaw shara mi kaw n shim yang shara mi de bai htawt sit ra re ai masa nga ai lam chye lu ai.

Sumpyi Yang mare hta htinggaw 200 grup yin shanu nga ai mare kaba langai re hte mung masha 1000 jan shanu nga ai re, ya aten kadai mung kadai chye ai shara ni de koi yen hkawm nga ai ra ai re lam mung chye lu ai.

Hugawng

Photo Credit