Myen Hpyen Dap Kawn Tang Hpare Shagyit Kaw Hkum Pat Ai Majaw Hkrun Lam Hkawm Mung Masha Ni Yak Hkak Ai Lam

Pajau Media

October 2, 2025

Myitkyina lahta daw Tang Hpare shagyit kaw pru maga hpe Myen hpyen dap pat da ai majaw hkrun lam hkawm Mung masha ni hte hkyak hkyak Tsi tsi hkam la ra ai ni a matu grai yak hkak nga ai lam chye lu ai.

Myen hpyen dap gaw Tang Hpare shagyit hta Myitkyina kaw na shang wa ai hpe sha hkap la shalai ai re hte pru maga de gaw asak 18 ning kaw na 40 ning lapran na ni hpe pru hkawm na matu ahkang n jaw da ai lam, Myitkyina de tsi wa tsi ai Mung masha langai tsun ai kaw na chye lu ai.

"Machyi ai majaw Myitkyina de tsi wa tsi ai re, wa na nga tim n mai, Myitkyina de n htang ga ngu yang mung gumhpraw n nga, tinang n ta kaw re yang sha na lu sha gaw nga le, tinang n ta wa mayu ai. Nbungli hte wa ga nga yang manu grai bai hpu taw, n dang ai le, KIA hte PDF ni hpyen lahkawn na tsang ai nga tim tsi wa tsi ai ni hpe gaw ahkyak ai hku shalai ging ai" nga nna tsun ai re.

Myitkyina de tsi wa tsi ai ni, ma makawp maga tsi htu ai ni hpe n shalai ai majaw yak hkak nga ma ai re lam, ya aten na gunrai manu, gumhpraw tam yak ai aten mung re majaw ya na zawn pat shingdang ai lam gaw n byin ging ai, yak hkak ai ni hpe shalai yang kaja ai nga nna mung tsun ai re.

Myitkyina Putao lam dingyang hta KIA, PDF hpung ni kawn hpyen lahkawn ai majaw Myen hpyen dap kawn mung hkrun lam hkawm masha ni, Tsi tsi yu ai ni hpe mung n shalai ai re lam chye lu ai.

Shiga- Zau