Myen Hpyen Dap Lak Nak Kaba A Majaw Shata (6) Laman Mung Masha Marai (145) Asak Si Sum Ai Hta Jinghpaw Mung Na Marai (10) Lawm Ai Lam

Pajau Media

August 13, 2025

Mung Masa Bawng masha ni hpe garum shingtau nga ai hpung kawn n dau da ai hta 2025 Febuary shata kaw nna August 12 ya du hkra Myen hpyen dap lak nak kaba gap ai majaw Mungdan ting madang amyu shayi marai (68) hte la marai (78) asak si sum ai lam chye lu ai.

Myen hpyen dap lak nak kaba gap ai majaw mung masha marai (146) asak si sum sai re hte dai hta asak (18) ning n pu asak n hpring shi ai marai (29) lawm ai rai nna, Tanintharyi ginra kaw na marai (27) asak si sum ai law dik ginra rai nna Jinghpaw mung kaw na mung marai (10) lawm ai lam chye lu ai.

August 7 ya shani Jinghpaw Mung Hpakant ginra Pyuha kawng kaw dap jung nga ai Myen hpyen dap hpung ni a gap ai Lak nak kaba a majaw Sikmu mare KBC Nawku jawng wang kata de wa hkrat kapaw ai hta hpyen koi yen ai amyu shayi langai Pala hkra hkala asak si sum ai lam chye lu ai.

Ndai laman hta mung Myen hpyen dap gaw Hpakant ginra maga de hpyen shamu shamawt ai lam laja lana galaw nga ai rai nna lak nak kaba sha n-ga nbungli bawm gap shadam ai lam jahkring hkring galaw nga ai majaw Mung masha asak si sum ai lam grau grau law wa ai re lam chye lu ai.

Matut nna Myen hpyen dap uphkang ai hpang nga wa ai Ginhtawng Rawt Malan ladaw laman asak si sum lai wa sai Mung masha gaw (7,060) nga sai re lam tang madun da ai.

N-tara ai hku Mungdan ahkang aya gashun la ai laman rim hkrum ai Mung masha marai (2,9530) nga ai rai nna dai kaw nna marai (22,291) gaw naw rim zing da hkrum ai re hte marai (10,970) gaw htawng jahkrat sharen da hkrum ai re lam chye lu ai.

 Shiga – Htu Seng