Myen Hpyen Dap Laknak Kaba Gap Ai Majaw Mung Masha Marai 4 Bai Asak Si Sum Ai Lam

Pajau Media

September 25, 2025

Gasat gala n byin tim Myen hpyen dap laknak kaba gap shadam ai majaw September 23 ya shana yup tung hta Ma Na mare kaw laknak kaba wa hkrat ai majaw Mung masha marai (4) asak si sum nna marai (1) hkala hkrum ai lam ginra masha ni kaw na chye lu ai.

“ Shana hkying 1 pyi htu hkyen sai, Hpakant Byuha kawng kaw nna gap ai, Ma Na Maw kaw laknak kaba wa hkrat ai majaw marai 4 kalang ta si ai, marai 1 gaw hkala sawng ai, shana yup tung kaw masha yawng yup pyaw taw ai aten re majaw hprawng yen ten nlu mat ai” Mana mare masha langai tsun ai re.

September 24 ya shana hkying 4 aten daram hta Ma Na mare Gawdin pa shawng ကြယ်နီကွမ်းယာဆိုင် makau na nta langai kaw mung laknak kaba langai wa hkrat kapaw ai re lam chye lu ai. Myen hpyen dap gaw Hpakant Byuha, Lawng Hkang Yam shadu jak rung sha n-ga Maw Wan Kaji, Maw Wan Kaba, Maw Mau Layang, Amaik Pon, Tawng Pyu, Sharaw Hka, Maw Tawng, San Chyoi hte Yu Ma mare ni hkan shamu shamawt nga ai re lam chye lu ai.

Lawng Hkang နှစ်မျက်နှာဘုရား, Lay Pin Hpaji jawng, Maw Si Zar Hpayar Kung, Mashi Kahtawng mayan hkan shara la da ai lam chye lu ai. September 22 ya shani mung Drone bawm a majaw Hpakant Chyauk Thwe Tawng kaw shan wa lahkawng yan kalang ta asak si sum lai wa sai re.

Ya aten Hpyen masa a majaw Myen hpyen dap a nbungli htim gasat ai lam, laknak kaba hte Ga lam htim gasat majan ni hpe grai sadi maja ra ai nga nna KIA tsun ahkang lu ai Du Kaba Naw Bu tsun sadi jaw da ai re hpe chye lu ai.

Myen hpyen dap gaw Mung masha ni nga ai shara de laknak kaba gap bang ai lam, drone bawm jahkrat ai lam ni galaw nna hpyen tara tawt lai ai lam ni galaw nga ai lam Kachin shinggyim ahkaw ahkang hpung KHRW kawn n dau da ai re.

Shiga - Kachin Pyi Tar