Myen Hpyen Dap Laknak Kaba Gap Ai Majaw Seng Tawng Mare Mung Masha Langai 1 Asak Si Sum Nna Marai (5) Hkala Ai Lam

Pajau Media

August 8, 2025

Jinghpaw Mung Hpakant Seng Tawng akyu hpyi bum makau Sikmu KBC Nawku Jawng wang kaw August 7 ya shana hkying (9:00) PM aten daram hta Myen hpyen dap gap ai laknak kaba wa hkrat kapaw nna Mung masha si hkala hkrum ai lam chye lu ai.

“ Seng Tawng akyu hpyi bum kawng kaw wa hkrat ai nga yang shanhte masing nga nga hte gap ai re, Galoi aten du hkra gap taw na kun n chye sai” nga nna ginra masha ni tsun ai.

Dai Laknak kaba gaw Hpakant Pyuha Kawng kaw Jung da nna gap bun nga ai rai nna Seng Tawng Sikmu Lawk kaw nga ai Akyu hpyi Bum Kawng makau KBC Nawku Jawng wang kata de wa hkrat kapaw ai re lam chye lu ai.

Laknak kaba wa hkrat kapaw ai majaw mara kata amyu shayi langai asak si sum nna Ma kaji mung lawm yang marai (5) hkala sawng ai lam chye lu ai.

Dai sha n-ga August 5 ya shani Hpakant Si Pin Koi Tit ginra mayan kaw wa hkrat kapaw ai Laknak kaba a majaw hkala sawng ai Tsang (9) jawng ma num kasha mung tsi tsi hkamla nga ai aten asak si sum mat ai lam matut chye lu ai.

Shiga - ND