Myen Hpyen Dap Laknak Kaba Gap Shadam Ai Majaw Asak 2 Ning Re Ai Ma Asak Si Sum Nna Marai 5 Hkala Hkrum Ai Lam

Pajau Media

November 21, 2025

Lahkawng maga gap gasat hkat ai lam n nga tim myen hpyen dap gaw shani shana aten ntam laknak kaba gap ai lam galaw nga ai re hte November 21 ya shana hkying 11 aten daram hta mung Hpakant Seng Tawng mare maga de laknak kaba wa hkrat kapaw nna asak 2 ning re ai ma hte mung masha marai 5 hkra hkala ai re lam chye lu ai.

“ shana shagu gap ai, Maw Ga gaw chye ai hte maren tam sha ra ai re majaw gasat poi byin ai ten sha zim nna masha bai kamawng sai, tinang na tinang sadi na nga ra ai, gasat poi n byin tim gap ai gaw n zim ai, shana shagu laknak kaba nsen nna ai ngu n nga ai” nga nna ginra masha tsun ai.

Hpakant Tatma Kawng hte Mashi Kahtawng Rahkai Kawng kaw nna laknak kaba 10 lang daram gap bun ai hta Seng Tawng lawk 1,3 hte San Tithar Kung shara ni hkan wa hkrat kapaw ai majaw ma langai asak si sum nna la marai 2, amyu shayi marai 3 hkala hkrum nna dum nta hten za ai lam chye lu ai.

Jinghpaw Mung Hpakant, Manmaw, Waimaw ginra hkan gasat gala majan masa shaja hkat nga ai rai nna Waimaw ginra maga de mung lai wa sai bat laman gaw sinat nsen ni zim taw ai raiitm November 20 ya shana hkying 11 aten daram kaw nna laknak kaba gap n sen ni bai na taw sai majaw ginra masha ni myit tsang nga ma ai re hpe chye lu ai.

Shiga- Pyilan U