Myen Hpyen Dap Nbungli Bawm A Majaw Waimaw Lamyang Mung Masha Si Hkala Hkrum Ai Lam

Pajau Media

September 1, 2025

Myen hpyen dap gaw Waimaw Lamyang ginra de hpyen n-gun htu shadut dingyang re hte nbungli bawm jahkrat gasat ai majaw Mung masha 1 asak si sum nna marai 4 hkala hkrum ai lam nga ai.

August 31 ya shani ka-ang aten hta nbungli bawm wa jahkrat ai hta asak 6 ning ram re ai Shayi Shesoi Hkawng Naw asak si sum nna, Shesoi Ze Nyoi asak 25 ning, Shesoi Ze Yang asak 15 ning, Slg Sayaw Lum Hkawng asak 54 hte Slg Ting Bawm asak 36 ning ni hkala hkrum ai lam chye lu ai.

Dai ginra masha ni gaw Lamyang, Nam Wa Muk Chyik hkan na Mung masha ni re hte hkawm sa hkawm wa lai hkawm ai aten hkala hkrum ai lam chye lu ai.

Waimaw ginra hpyen masa hpe shawng lam shi sawk langai tsun ai hta "Lamyang hkan majan laja nga ai, lai wa sai bat hkan Lamyang Lhaovo Nawku Jawng hkan myen ni shara la da ai re, dai hkan mung Shanglawt ni bai lu la sai, lahkawng maga hpyen masa grai shaja hkat taw ai masa re" nga nna tsun ai re.

Myen Hpyen hpung ni gaw Myen Mung ra lata poi n du shi ai laman Waimaw ginra hpe jum tek lu hkra masing kaba hte htu shadut nga ai masa re lam mung masa maram nga ai ni tsun nga ma ai re.

N dai laman Myitkyina M.P.Hk kaw nna mung shani shana Laknak kaba gap bun ai majaw Mung masha si hkala hkrum ai lam byin law ai re hpe mung chye lu ai.

Shiga - Pyilan U