Myen Hpyen Dap Ra Lata Poi Ndu Shi Ai Laman Putao Ginra Hpe Zing Madu Na Matu Shajin Wa Ai Lam

Pajau Media

October 16.2025

Myen hpyen dap woi awn galaw na Ra lata poi aten ladaw ni wa sai hte maren Jinghpaw Mung kata Myen hpyen dap a htu shadut htim gasat masing gaw n yawm ai sha grau laja wa ai hta Ra lata poi galaw na ginra jahpan kaw Putao Hkawng Lang hpu ginra ni mung lawm ai re hte ya aten dai ginra hkan hpyen masa shaja hkat nga ai lam chye lu ai.

N dai laman Putao Lung Sha Yang makau Tan Ja hte Machanbaw Ginra kata na Htang Ga mare makau hkan du hkra Hpyen shamu wa nna gasat gala byin wa ai rai nna Myen hpyen dap gaw Ra lata poi n du shi ai laman Putao ginra hpe zing madu lu hkra shakut nga ai masa re hpe chye lu ai.

Myen hpyen dap gaw Jinghpaw Mung kata Myitkyina, Danai, Mohnyin, Putao, Hkawng Lang Hpu Ginra ni hta Ra lata poi galaw sa wa na lam n dau da ai re hte ya aten Putao, Hkawng Lang Hpu Ginra ni hta hpyen n-gun jat htu shadut ai sha n-ga n dai shata Praw laman hta sha Myen hpyen P.T.Ts pawng hpawm hpung ni hpe madi shadaw n-gun madun ai lam hpe Putao Hkawng Lang Hpu Ginra hta galaw lai wa sai re.

Htang Ga Ginra hkan shawng daw de hpyen masa shaja hkat hkrit tsang ra ai lam n nga ai re hte ya na zawn gasat gala majan byin wa ai majaw dai ginra masha ni a matu galaw lu galaw sha, hkawm sa hkawm wa lam ni grai yak hkak dut dang mat ai lam dai ginra masha ni tsun ai re.

October 11 ya daram kaw nna Htang Ga mare makau de gasat gala majan byin ai majaw ya aten lam lapran kaw chyat nga ai ni nga ai zawn, Myo de jawng bai sa lung na Jawngma n kau mung chyat nga ai re hpe chye lu ai. Gasat gala majan a majaw ya aten Htang Ga kaw nna Sinpraw hkran ginra hkawm sa hkrun lam naw pat da dingyang re lam chye lu ai.

Shiga - Pyilan U