Myen Hpyen Dap Rim Da Ai Mawdaw Kaba Ni Hpe Mai Na Gaw Din Pa Kaw Naw Zing Da Ai Lam

Pajau Media

5 February 2026

Myen Hpyen Dap gaw dingyang lai wa lai sa galaw nga ai gunrai htaw mawdaw kaba ni hpe Mai Na gaw din pa kaw rim zing da dingyang re lam ginra masha ni tsun ai kaw na chye lu ai.

Dai lam hte seng nna ginra masha ni tsun ai hta “ya hte February praw 2 shani lai wa ai mawdaw yawng hpe hpyen la ni hte dai gaw din pa de gawt bang dat ai rai nga, dai kaw hpyen la ni mung sin taw ai re, ya du hkra naw zing da ai, gumhpraw hte she bai n shaw la ra na, gunrai maw daw ni hpe gumhpraw grai hta sha ai nga shiga mawng ai majaw galaw ai re ngu mu ai” nga nna tsun ai re.

Rim da sai mawdaw ni hpe Mai Na gaw din Pa kaw yawng jahkring da ai re hte gunrai mawdaw (50 ) jan daram rim zing da ai rai nna dai hpe balik ni sin nga dingyang re lam mung chye lu ai.

Lai wa sai bat laman kaw nna Waimaw Lamyang ginra de htu shadut ai lam laja lana galaw ai hpang February 2 ya shani hta gaw Mai Na Washawng lam langu sun kaw dung ai P.T.Ts gumhpraw hta ai shagyit hpe KIA pawng hpawm hpung ni zing madu kau ai hpang ya na zawn mawdaw rim ai lam byin wa ai re.

Maram yu ai hta gumhpraw hta sha ai lam hte seng nna shiga grai mawng wa ai majaw ya na zawn bai htim gasat hkrum ai re ngu ai hku nna mawdaw ni hpe rim zing ai mung mai byin ai lam mawdaw la n kau tsun maram nga ma ai re. Ya aten hpyen masa grai naw shaja hkat nga ai majaw Waimaw-Washawng lam naw pat da ai re hpe mung chye lu ai.

Dai hpang ginra shiga ni hkan Mai Na hpyen yen dabang makau kaw Myen Hpyen Dap shara wa la ai lam shiga ni mawng nga ai raitim ta tut hta gasat gala byin ai shani shamu shamawt ai lam gaw nga ai, dai kaw shara la wa dung ai lam gaw n nga ai hpe ginra masha ni tsun ai kaw na chye lu ai.

Shiga- Pyilan U