Myen Hpyen Dap Rim Hkrum Ai Kaw Na Hprawng Mat Ai Amyu Shayi Langai Hka Lim Si Mat Ai Lam

Pajau Media Channel

17th May, 2024

Myen hpyen hpung ni gaw ya aten Putao ginra mayan de hpyen n-gun jat shamu shamawt ai lam ni galaw ai re hte march 13 ya shani Sumpyi Yang mare de kajawng kaja Myen hpyen hpung du shang wa ai majaw mare masha ni Nam de hprawng yen ma ai, hkrit tsang let hprawng koi yen hkawm ai hta mayu shayi langai hka lim si mat ai lam nga ai re hpe mung chye lu ai.

Sumpyi Yang mare de Tat Ma (88) hpyen hpung ni du shang wa na lam shiga na ai hte mare masha ni gaw nam de may 12 ya daram kaw nna jau tau hprawng yen ma ai re, nam de koi yen mat ai kaw na amyu shayi marai 5 gaw may 14 ya shani mare de arung arai wa la na matu wa ai kaw Myen hpyen dap ni kawn rim nna san jep ai lam galaw ai re hpe mung chye lu ai. May 15 ya shani rim hkrum ai amyu shayi ni gaw kadai mung kadai man yawng ai de hprawng mat ai hta N Tsi Hka kaw hka lim si mat ai re lam chye lu ai.

“ mani byin ai rai nga , shanhte marai 5 kaw nna asak kaba dik re, asak gaw kru shi jan na shadu ai, shi gaw hka nlu hpung yawt sai, shanhte marai 5 kadai mung kadai chye ai de hprawng mat ai re, dai amyu shayi gaw Ntsi Hka kaw yawng lawm mat ai re ya du hkra moi mang n mu shi ai, Myen hpyen dap maga kawn mung hkan tam na tsang ai majaw kadai mung n gwi sa tam ai” nga nna sara langai tsun ai re.

Sumpra Bum ginra hpe zing madu la ngut ai hpang Myen hpyen hpung ni gaw dai ginra mayan de htu shadut hpyen n-gun jat nga dingyang re lam mung chye lu ai. Sumpyi Yang mare kaw Hk.L.Y (46), tat ma (88) hte P.T.Ts pawng hpawm hpyen hpung ni dap shara jahkrat nga ai rai nna KIA, KPDF pawng hpawm hpyen hpung ni lapran gasat gala majan ni mung nga ai re majaw mare masha ni yawng ngu na daram nam de hprawng yen ai bat mi daram na wa sai re hpe mung chye lu ai.

Shiga -Mali Hku